Ռեալը ձախողվեց` պարտվելով Լայպցիգին 🎥

Չեմպիոնների լիգայի 5-րդ տուրում «Ռեալ Մադրիդը» F խմբի շրջանակում հյուրընկալվելիս մրցեց «Լայպցիգի» դեմ։

Հանդիպման մեկնարկում «ցլերը» պարզապես սառը ցնցուղ էին պատրաստել «արքայական» ակումբի համար և արդեն 18-րդ րոպեի դրությամբ հաղթում էին 2:0 հաշվով։

Մարկո Ռոզեի թիմի կազմից 13-րդ ու 18-րդ րոպեներին մեկական անգամ աչքի ընկան համապատասխանաբար Յոշկո Գվարդիոլն ու Քրիստոֆեր Նկունկուն։

Նախքան ընդմիջում Կառլո Անչելոտիի թիմը մեկ գնդակ հետ բերեց. 44-րդ րոպեին գոլի հեղինակ դարձավ Վինիսիուսը։

Երկրորդ կեսում հյուրերը ոչինչ չկարողացան առաջարկել մրցակցին։

Դեռ ավելին` տանտերերը 81-րդ րոպեին Տիմո Վերների խփած գոլի շնորհիվ վերականգնեցին երկու գնդակի առավելությունը։

«Սերուցքայինները» 90+4-րդ րոպեին միայն կրճատեցին հաշիվը. 11-մետրանոցից հանդիպման վերջնական հաշիվը ձևակերպեց Ռոդրիգոն։

Այսպիսով, «Լայպցիգը» հաղթեց 3:2 հաշվով. «արքայական» ակումբն ընթացիկ մրցաշրջանում բոլոր մրցաշարերի շրջանակում կրեց առաջին պարտությունը։

Այս խմբում կայացավ ևս մեկ հանդիպում.

«Սելթիկ» 1:1 «Շախտյոր Դոնեցկ»

F խումբը 5-րդ տուրից հետո ստացավ հետևյալ տեսքը.

1. «Ռեալ Մադրիդ» – 10 միավոր
2. «Լայպցիգ» – 9 միավոր
3. «Շախտյոր» – 6 միավոր
4. «Սելթիկ» – 2 միավոր

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am