Սևիկյանի հայրը կվճարի իր որդու հրաժարագնի մի մասը

Ինչպես արդեն տեղեկացրել ենք, «Պարի ՆՆ»-ի կիսապաշտպան Էդգար Սևիկյանը կարիերան կշարունակի հունգարական «Ֆերենցվարոշի» կազմում։

Իսնայդեր Իվան Կարպովը հայտնում է, որ հայազգի ֆուտբոլիստի հայրը` Մարտիրոս Սևիկյանը, վճարելու է իր որդու հրաժարագնի մի մասը։

Աղբյուրի փոխանցմամբ` Նիժնի Նովգորոդը ներկայացնող ակումբի և 22-ամյա ֆուտբոլիստի միջև գործող պայմանագրում առկա է հրաժարագնի կետ, որն էլ ակտիվացրել է «Ֆերենցվարոշը»։

Հունգարական ակումբը գործարքի դիմաց «Պարի ՆՆ»-ին վճարելու է 1,1 մլն եվրո։

Հաղորդվում է, որ Սևիկյանի հայրը գործարքն իրականացնելու համար ներդրել է 300 հազար եվրո, իսկ գումարի մնացած մասը կվճարի «Ֆերենցվարոշը»։

Գործարքը պաշտոնապես կհաստատվի միայն այն ժամանակ, երբ «Ֆերենցվարոշը» ամբողջությամբ վճարի նախատեսված գումարը։

Նշվում է, որ «Պարի ՆՆ»-ը չի ցանկացել վաճառել Սևիկյանին և ժամանակ առ ժամանակ նրան առաջարկել է երկարաձգել գործող պայմանագիրը` թարմացնելով նաև հրաժարագնի կետ։

Այդուհանդերձ, Մարտիրոս Սևիկյանը, «Պարի ՆՆ»-ի ղեկավարությանը պահանջել է, որպեսզի թույլ տա իր որդուն հեռանալ ակումբից։

Հատկանշական է, որ Սևիկյանի ծառայություններով հետաքրքրված են եղել նաև «Կրասնոդարն» ու ԲԿՄԱ-ն, սակայն հայազգի ֆուտբոլիստը նպատակ է ունեցել տեղափոխվել եվրոպական որևէ առաջնություն։

Սևիկյանի ընտրության հարցում կարևոր խթան է հանդիսացել նաև այն, որ «Ֆերենցվարոշը» մասնակցում է Կոնֆերենցիաների լիգայի փլեյ-օֆֆ փուլի և 1/16 եզրափակիչի շրջանակում մրցելու է «Օլիմպիակոսի» դեմ։

Հավելենք, որ 22-ամյա ֆուտբոլիստն ընթացիկ մրցաշրջանում բոլոր մրցաշարերի շրջանակում անցկացրել է 24 հանդիպում` դառնալով 7 գոլի հեղիանկ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am