Նևիլ.««Երազանքների թատրոնը» վերածվել է «Ոչինչի թատրոնի»»

Անգլիայի Լիգայի գավաթի 1/8 եզրափակիչում «Մանչեսթեր Յունայթեդը» սեփական հարկի տակ 0:3 հաշվով պարտվեց «Նյուքասլին»` լքելով հետագա պայքարը։

Հանդիպումից հետո «կարմիր սատանաների» նախկին պաշտպան Գարի Նևիլը քննադատել է մանկունյական ակումբին և գովեստի խոսքեր շռայլել «Նյուքասլի» ղեկավարության հասցեին.

«Մարզադաշտի թունել տանող ճանապարհին հանդիպեցի Դեն Էշվորթին (խմբ.` «Նյուքասլի» սպորտային տնօրենը)։ Նա փոխեց Անգլիայի ֆուտբոլային միության համակարգը, «Բրայթոնին» պատրաստեց այս անհավանական հաջողությանը և այժմ էլ ամուր հիմքեր է ստեղծել «Նյուքասլի» նոր ղեկավարության համար։

Նա գրագետ է և բարձր որակավորում ունի։ Էշվորդն ակումբի մարզչական շտաբի, ֆուտբոլիստների և մյուս բոլոր գերատեսչությունների աշխատակիցների հետ աշխատում է հանգիստ և համահունչ։

Վերջին երկու խաղերում «Մանչեսթեր Յունայթեդը» մրցել է այնպիսի ակումբների դեմ, որոնք հատուկ բաժին են ստեղծել` խաղաղաշտում և դրանից դուրս թիմին աջակցելու համար։

«Յունայթեդում» ամեն ինչ ճիշտ հակառակն է։ Մենք, նույնիսկ, սպորտային տնօրեն չունենք։

Ես հաճախ եմ եղել «Նյուքասլի» մարզադաշտում և զգացել նրա հիանալի երկրպագուներին, երբ Մայքլ Էշլիի (խմբ.` «Նյուքասլի» նախկին սեփականատերը) պատճառով կորցնում էին իրենց էներգիան և էնտուզիազմը։ Այդ ամենը շատ ցավալի էր։

Նախորդ երեկո մենք տեսանք, թե ինչպես է «Երազանքների թատրոնը» (խմբ.` «Օլդ Թրաֆորդ» մարզադաշտն անվանում են նաև այդպես) վերածվել է «Ոչնչի թատրոնի»։ «Յունայթեդի» յուրքանչյուր երկրպագու ձանձրույթ և անտարբերություն է զգում այս ամենից։

Ֆուտբոլիստները խաղադաշտում շոկի մեջ էին, խաղն աղետալի էր, իսկ մարզիչը մեր աչքի առջև հայտնվեց տխուր իրավիճակում։

Մենք այս ամենն արդեն տեսել ենք և գիտենք, թե այն ինչպես է ավարտվում։ Բավական է»,- գրել է Նևիլը X-ի իր միկրոբլոգում։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am