Բարսելոնան ապագայում Խավիին փոխարինելու թեկնածու ունի

Բարսելոնան ապագայում Խավիին փոխարինելու թեկնածու ունի

02/11/2022 - 11:05

«Բարսելոնան» Միկել Արտետային դիտարկում է որպես ապագայում ակումբը գլխավորելու ամենահավանական թեկնածու։

Ինչպես տեղեկացնում է Diario Sport-ը, խոսքը ներկա պահի կամ մոտ ապագայի մասին չէ, քանի որ այժմ «Բարսելոնան» շարունակում է հույսեր կապել Խավիի հետ և վստահում է նրան։

Այնուամենայնիվ, «Արսենալի» ղեկին Արտետայի կատարած աշխատանքը գրավել է կատալոնական ակումբի ուշադրությունը:

Արտետան «Բարսելոնայի» սան է և «Մանչեսթեր Սիթիում» ընդգրկված է եղել Պեպ Գվարդիոլայի մարզչական շտաբում ու, ըստ «բլաուգրանայի» ղեկավարության, նա ունի բոլոր որակները, որպեսզի ապագայում գլխավորի ակումբը։

Բացի դրանից, «Բարսելոնայի» ղեկավարները կարծում են, որ Արտետան հիանալի է ծանոթ ակումբի գաղափարախոսությանը։

Հաղորդվում է, որ 40-ամյա մասնագետի թեկնածությունը «Բարսելոնան» կդիտարկի այն ժամանակ, երբ գլխավոր մարզչի պաշտոնը թափուր կլինի։

Նշվում է, որ «Բարսային» դուր է գալիս ոչ միայն «Արսենալի» խաղաոճն Արտետայի գլխավորությամբ, այլև թիմը ղեկավարելու նրա սկզբունքները։

Մասնավորապես, խոսքն այն մասին է, թե ինչպես է մարզիչը լուծել հարձակվող Պիեր-Էմերիկ Օբամեյանգի հետ ունեցած կոնֆլիկտը։

Արտետայի` ապագայում «Բարսելոնայի» գլխավոր մարզիչ նշանակվելուն կարող է խթանել նաև այն հանգամանքը, որ վերջինս հիանալի հարաբերություններ ունի կատալոնական ակումբի գլխավոր տնօրեն Մատեու Ալեմանիի և սպորտային տնօրեն Յորդի Կրոյֆի հետ։

Այդուհանդերձ, ակնկալվում է, որ Խավին դեռևս մի քանի մրցաշրջան կշարունակի մարզել «Բարսելոնան»։

Արտետան նույնպես չի պատրաստվում լքել «զինագործների» շարքերը և մինչև 2025 թ. հունիսի 30-ը գորոծղ պայմանագիր ունի «Արսենալի» հետ։

Ամեն դեպքում, «կապտանռնագույնների» ղեկավարությունը շարունակելու է հետևել Արտետայի շուրջ զարգացող իրադարձություններին և կատարած աշխատանքին։

Հիշեցնենք, որ իսպանացի մասնագետը լոնդոնյան ակումբի գլխավոր մարզիչ է նշանակվել 2019 թ. դեկտեմբերին։

«Արսենալն» Արտետայի գլխավորությամբ 2020 թ. դարձել է Անգլիայի գավաթակիր և Սուպերգավաթակիր։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

# , , ,

Մեջբերումներ անելիս ակտիվ հղումը Interfootball.am-ին պարտադիր է: Կայքի հոդվածների մասնակի կամ ամբողջական հեռուստառադիոընթերցումն առանց Interfootball.am-ին հղման արգելվում է: Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:

© Interfootball.am 2023