«Ռեալը» պատրաստ է «Ման. Սիթիի» աստղին 4 տարվա պայմանագիր առաջարկել

«Մանչեսթեր Սիթիի» կիսապաշտպան Ռոդրին կարող է տեղափոխվել Մադրիդի «Ռեալ», գրում է Sky Sport-ը։

Հուլիսի 21-ին «Արքայական ակումբի» ներկայացուցիչները Մադրիդի ռեստորաններից մեկում հանդիպել են Իսպանիայի ազգային հավաքականի ավագի գործակալին։

«Լոս Բլանկոսը» պատրաստ է մինչև 2030թ. հուլիսի 1-ը պայմանագիր առաջարկել 30-ամյա ֆուտբոլիստին։ Ռոդրիին ձեռք բերելը մադրիդյան գրանդի տրանսֆերային գլխավոր նպատակներից է։

Փորձառու ֆուտբոլիստը բազմիցս ակնարկել է, որ մտադիր է վերադառնալ հայրենիք։ Իսպանացի կիսապաշտպանը դեռ չի շտապում երկարաձգել «Մանչեսթեր Սիթիի» հետ գործող պայմանագիրը, որը կսպառվի 2027թ. հուլիսի 1-ին։

Հավանական տեղափոխության հարցում «Ռեալի» ու «Մանչեսթեր Սիթիի» միջև դեռ բանակցություններ չեն սկսվել։ «Սերուցքայիններն» այժմ փորձում են սկզբունքային համաձայնության հասնել ֆուտբոլիստի հետ։

Ռոդրին «Մանչեսթեր Սիթիում» հանդես է գալիս 2019թ. հուլիսից, 298 խաղում խփել է 28 գոլ, կատարել 32 ասիստ։ Նա իսպանական ակումբներից խաղացել է «Վիլյառեալում» և Մադրիդի «Ատլետիկոյում»։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

Հ.Գ.Գ. միացե՛ք Interfootball-ի Instagram-ի էջին https://shorturl.at/6vBm