Պաշտոնական. Ժերար Պիկեն ավարտում է կարեիան

«Բարսելոնայի» կենտրոնական պաշտպան Ժերար Պիկեն հայտարարել է կարիերան ավարտելու մասին.

«Անցնող շաբաթների և ամիսների ընթացքում շատերն են խոսել իմ մասին: Մինչ այժմ ես լռել եմ, իսկ հիմա եկել է խոսելու պահը։

Ինչպես ձեզնից շատերը, ես միշտ եղել եմ «Բարսայի» երկրպագու: Ես ծնվել եմ ֆուտբոլասերների և «Բարսելոնայի» երկրպագուների ընտանիքում։ Երբ փոքր էի, ցանկանում էի դառնալ ոչ թե ֆուտբոլիստ, այլ «Բարսայի» խաղացող։

Վերջերս ես շատ էի մտածում այդ տղայի մասին: Չգիտեմ էլ` ինչ կլիներ, եթե այն ժամանակ նրան ասեին, որ իր բոլոր երազանքներն իրականանալու են, որ նա հայտնվելու է «Բարսայի» առաջին թիմում, նվաճելու է բոլոր հնարավոր գավաթները, դառնալու է Եվրոպայի և աշխարհի չեմպիոն, խաղալու է աշխարհի լավագույն ֆուտբոլիստների հետ և դառնալու է թիմի ավագներից մեկը և գտնելու է ընկերներ ամբողջ կյանքի համար։

Արդեն 25 տարի է, ինչ ես միացել եմ «Բարսելոնային»: Ես հեռացա, սակայն վերադարձա։ Ֆուտբոլը, «Բարսելոնան» ու կուլեսն ինձ ամեն ինչ տվել են։

Եվ հիմա, երբ այս տղայի բոլոր երազանքներն իրականացել են, ես ուզում եմ ձեզ տեղեկացնել իմ որոշման մասին, որ ժամանակն է ավարտել այս ճամփորդությունը: Ես միշտ ասել եմ, որ, բացի «Բարսայից», այլ թիմում հանդես չեմ գա։ Եվ այդպես էլ կլինի։

Շաբաթ օրվա խաղը կլինի իմ վերջին հանդիպումը «Կամպ Նոու» մարզադաշտում։ Ես միշտ կլինեմ ակումբի ​​երկրպագու, կաջակցեմ թիմին։ Ես իմ սերը «Բարսայի» հանդեպ կփոխանցեմ երեխաներիս, ինչպես դա արել են ծնողներս:

Դուք ինձ լավ եք ճանաչում. ես վաղ թե ուշ կվերադառնամ»,- նշել է Պիկեն սոցցանցերի իր էջերում տարածած տեսանյութում։

Նշենք, որ Պիկեն «բլաուգրանայի» մարզադպրոց ընդունվել է դեռևս 1997 թվականին, որտեղ հանդես է եկել մինչև 2004 թ., ինչից հետո տեղափոխվել է «Մանչեսթեր Յունայթեդ» (23 հանդիպում, 2 գոլ և 1 գոլային փոխանցում)։

Պիկեն 2006/07 մրցաշրջանը վարձավճարով անցկացրել է «Սարագոսայի» կազմում` (28 հանդիպում, 3 գոլ)։

Իսպանացի պաշտպանը 2008 թվականին վերադարձավ «Բարսելոնա», որի կազմում հանդես էր գալիս մինչ օրս` անցկացրած 615 խաղում դառնալով 53 գոլի և 15 գոլային փոխանցման։

Ժերար Պիկեն կարիերայում 8 անգամ դարձել է Իսպանիայի չեմպիոն, 7 անգամ` Իսպանիայի գավաթակիր, 6 անգամ` Իսպանիայի Սուպերգավաթակիր, 4 անգամ` Չեմպիոնների լիգայի հաղթող, 3 անգամ` աշխարհի ակումբային առաջնության չեմպիոն, 3 անգամ` ՈՒԵՖԱ-ի Սուպերգավաթակիր, մեկական անգամ էլ` անգլիական Պրեմիեր լիգայի չեմպիոն, Անգլիայի Լիգայի գավաթակիր և Անգլիայի Սուպերգավաթակիր։

Նշենք, որ Պիկեն նաև 5 գոլի հեղինակ է դարձել նաև Իսպանիայի հավաքականի կազմում անցկացրած 102 խաղում։

Պիկեն «ֆուրիա ռոխայի» կամզում 2010 թվականին դարձել է աշխարհի, իսկ 2012 թվականին` Եվրոպայի չեմպիոն։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am