Մանչեսթեր Սիթին անկասելի է! Դե Բրոյնեն ու ընկերները ջախջախեցին Յունայթեդին🎥

Անգլիական Պրեմիեր լիգայի 28-րդ տուրի կենտրոնական հանդիպման շրջանակում «Մանչեսթեր Սիթին» «Էթիհադ» մարզադաշտում մրցեց «Մանչեսթեր Յունայթեդի» դեմ։

Կարելի է ասել` «քաղաքաբնակները» հանդիպումն սկսեցին մեկ գնդակի առավելությամբ, քանի որ արդեն 5-րդ րոպեին Կևին դե Բրոյնեն առաջ մղեց «Սիթիին»։

«Կարմիր սատանաների» պատասխանը չուշացավ. 22-րդ րոպեին Ռալֆ Ռանգնիկի թիմը նետվեց կտրուկ հակագրոհի, որը հիանալի հարվածով եզրափակեց Ջեյդոն Սանչոն։

Այդուհանդերձ, «Յունայթեդի» ուրախությունը շատ կարճ տևեց։ 28-րդ րոպեին տանտերերը խառնշփոթ իրավիճակ ստեղծեցին Դավի դե Խեայի պաշտպանած դարպասի ուղղությամբ, որից էլ ամենարագը կողմնորշեց Կևին դե Բրոյնեն` դառնալով դուբլի հեղինակ։

Առաջին կեսի մնացած ժամանակահատվածում երկու ակումբներն էլ կարող էին հաշվի մեջ նոր փոփոխություն մտցնել, սակայն կողմերն ընդիջման գնացին 2:1 հաշվի պայմաններում։

Պեպ Գվարդիոլայի թիմը գրեթե կատարյալ երկրորդ խաղակես անցկացրեց ու որևէ հնարավարություն չտվեց մրցակցին։

«Քաղաքաբնակների» մեծ առավելությունը տվեց իր պտուղները. 68-րդ րոպեին անկյունայինի խաղարկումից հետո հիանալի գոլի հեղինակ դարձավ Ռիյադ Մարեզը` հաշիվը դարձնելով 3:1։

Նշենք, որ Կևին դե Բրոյնեն խփած երկու գոլին ավելացրեց նաև գոլային փոխանցում։

90+3-րդ րոպեին էլ Մարեզն ապահովեց հանդիպման «յուղոտ» ու ջախջախիչ վերջաբանը` նույնպես դառնալով դուբլի հեղինակ, իսկ լուսատախտակին վառվեց 4:1 հաշիվը։

Այսպիսով, «Մանչեսթեր Սիթին» հաղթեց 4:1 հաշվով, վաստակեց 69 միավոր և շարունակում է գլխավորել Պրեմիեր լիգայի մրցաշարային աղյուսակը։

«Մանչեսթեր Յունայթեդը», 47 միավորով, 5-րդն է։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am