Հայաստանի Մ-21 տարեկանների հավաքականը ցավալի պարտություն կրեց Սերբիայից 🎥
Եվրո-2023-ի որակավորման փուլի 4-րդ տուրում Հայաստանի Մ-21 տարեկանների հավաքականը H խմբի շրջանակում Երևանում մրցեց Սերբիայի իրենց տարեկիցների ընտրանու դեմ։
Հանդիպման առաջին խաղակեսն անցնում էր մեր տղաների թելադրանքով, ովքեր էլ 36-րդ րոպեին Միքայել Միրզոյանի խփած գոլի շնորհիվ առաջ անցան հաշվի մեջ։
Կողմերն ընդմիջման գնացին Ռաֆայել Նազարյանի սաների նվազագույն առավելության պայմաններում։
Ցավոք, երկրորդ խաղակեսում Սերբիայից ժամանած հյուրերը կարողացան բեկել հանդիպման ընթացքը ու 4 գնդակ ուղարկել մեր ընտրանու դարպասը։
Հանդիպման 56-րդ րոպեին տուգանայինի խաղարկումից հետո հաշիվը հավասարեցրեց Ստրախինիա Էրակովիչը։
Մինչև 85-րդ րոպեն հաշիվը հավասար էր, սակայն Հայաստանի երիտասարդական հավաքականը քանդվեց ու նախքան խաղավարտ ևս երեք գնդակ էլ հանեց սեփական դարպասից. աչքի ընկան Նիկոլա Թերզիչը, Սլոբոդան Թեդիչն ու Ժելկո Գավրիչը։
Այսպիսով, Հայաստանի Մ-21 տարեկանների հավաքականը 1:4 հաշվով ցավալի պարտություն կրեց Սերբիայից։
Մեր ընտրանին անցկացրած 4 խաղից հետո I խմբի շրջանակում վաստակել է ընդամենը 3 միավոր և զբաղեցնում է նախավերջին` 5-րդ հորիզոնականը։
Սերբիայի Մ-21 տարեկանների հավաքականն էլ վաստակեց 4 միավոր և բարձրացավ 4-րդ հորիզոնական, սակայն բալկաններն անցկացրել են 3 հանդիպում։
Խմբի առաջատարն Ուկրաինայի հավաքականն է, որը 2 խաղից հետո վաստակել է 6 միավոր։
Հավելենք, որ Հայաստանի Մ-21 տարեկանների հավաքականն իր հաջորդ հանդիպումը կանցկացնի հոկտեմբերի 12-ին և Երևանում կմրցի Հյուսիսային Մակեդոնիայի դեմ։
Հ․Գ․ միացե՛ք Interfootball-ի Telegram-ի ալիքին https://t.me/Interfootball_am