Ինտերը շարունակում է միավորներ բաժանել?

Իտալական Ա սերիայի 21-րդ տուրում Միլանի «Ինտերը» «Ջուզեպե Մեացա» մարզադաշտում չկարողացավ հաղթել «Կալյարիին»։ Թիմերը փոխանակվեցին մեկական գոլով։

23-րդ րոպեին իր նորամուտի խաղում գոլային փոխանցման հեղինակ դարձավ անգլիացի պաշտպան Էշլի Յանգը, որը եզրափակեց Լաուտարո Մարտինեսը։ Խաղի մնացած ժամանակահտվածում էլ միլանյան ակումբը առնվազ 3-4 անգամ կարող էր հաշվի տարբերությունն ավելի մեծացնել, սակայն նպաստավոր դիրքերից վրիպում էին։

Հանդիպման 78-րդ րոպեին հյուրերին հաջողվեց հավասարեցնել հաշիվը։ Ժոաո Պեդրոն փոխանցեց Ռաջա Նայնգոլանին, ում հարվածից հետո գնդակը դիպավ Ալեսանդրո Բաստոնիի ոտքին և հայտնվեց դարպասում։

Նշենք, որ 90+4-րդ րոպեին ոչ սպորտային պահվածքի պատճառով խաղադաշտից հեռացվեց Լաուտարո Մարտինեսը։

Այսպիսով, երրորդ խաղն անընդմեջ Անտոնիո Կոնտեի սաներն իրենց խաղն ավարտում են ոչ-ոքի՝ 1։1 հաշվով։ Այս արդյունքը «Յուվենտուսին» տալիս է ևս երկու միավորով առաջ պոկվելու հնարավորություն։

«Ինտերը» վաստակեց 48 միավոր և զբաղեցնում է 2-րդ հորիզոնականը, իսկ «Կալյարին» 31 միավորով 6-րդն է։