Էսպանյոլը դրամատիկ պայքարում դուրս մնաց Լա լիգայից 🎥

Էսպանյոլը դրամատիկ պայքարում դուրս մնաց Լա լիգայից 🎥

29/05/2023 - 11:16

Իսպանական Լա լիգայի 37-րդ տուրում «Էսպանյոլը» «Մեստալիա» մարզադաշտում հյուրընկալվելիս մրցեց «Վալենսիայի» դեմ։

Հանդիպումն ունեցավ բավական դրամատիկ ընթացք ու ավարտ։

Առաջին կեսում «չղջիկներն» ունեին խաղային առավելություն և 38-րդ րոպեին Դիեգո Լոպեսի ջանքերով առաջ անցան հաշվի մեջ։

Տանտերերի հաջողությունը շատ կարճ տևեց, քանի որ արդեն 40-րդ րոպեին «թութակները» խփեցին պատասխան գոլն. աչքի ընկավ Սեզար Մոնտեսը։

Կողմերն ընդմիջման գնացին 1:1 հաշվի պայմաններում։

Ընդմիջմանը կատալոնական ակումբի գլխավոր մարզիչ ԼուիսԳարսիան դաշտ դուրս բերեց դանիացի հարձակվող Մարտին Բրեյթվեյթին, ով էլ 50-րդ րոպեին արդեն «Էսպանյոլին» առաջ մղեց հաշվի մեջ։

Երկար ժամանակ հյուրերը պահպանում էին հաղթական հաշիվն ու թվում էր, ի վերջո, կհասնեն առավելության, սակայն այդ սցենարի հետ համաձայն չէին «Վալենսիայի» ֆուտբոլիստները, ովքեր 90+3-րդ րոպեին կտրուկ գրոհ զարգացրին, որը եզրափակեց Սամուել Լինոն և անչափ կարևոր ոչ-ոքի կորզեց «չղջիկների» համար։

Այս արդյունքից հետո «Վալենսիան» վաստակեց 41 միավոր և զբաղեցնում է 15-րդ հորիզոնականը` շարունակելով պայքարել տեղը Լա լիգայում պահպանելու համար։

41-ական միավոր ունեն նաև «Կադիսն» ու «Խետաֆեն», որոնք լրացուցիչ ցուցանիշներով զբաղեցնում են համապատասխանաբար 13-րդ ու 14-րդ հորիզոնականները։

«Վալենսիան» վերջին տուրից առաջ միայն 2 միավորով է գերազանցում 18-րդ հորիզոնականը զբաղեցնող «Վալյադոլիդին»։

Նշենք, որ 16-րդ և 17-րդ հորիզոնականները զբաղեցնող «Սելտան» ու «Ալներիան» էլ իրենց ակտիվում ունեն 40-ական միավոր։

Հավելենք, որ այս ոչ-ոքիից հետո «Էսպանյոլը» վաստակեց 36 միավոր և զբաղեցնում է 19-րդ հորիզոնականը` դուրս մնալով Լա լիգայից։

«Թութակները» հաջորդ մրցաշրջանում հանդես կգան Իսպանիայի նշանակությամբ երկրորդ դիվիզիոնում` Սեգունդայում։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

# , , , , , , , ,

Մեջբերումներ անելիս ակտիվ հղումը Interfootball.am-ին պարտադիր է: Կայքի հոդվածների մասնակի կամ ամբողջական հեռուստառադիոընթերցումն առանց Interfootball.am-ին հղման արգելվում է: Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:

© Interfootball.am 2023