Բարսելոնան կապ է հաստատել Բելգիայի գլխավոր մարզչի հետ

«Բարսելոնայում», հնարավոր է, շուտով մարզչական փոփոխություն տեղի ունենա։

Ինչպես տեղեկացնում է Goal.com-ը, կատալոնական ակումբը մտադիր է Ռոնալդ Կումանին հեռացնել զբաղեցրած պաշտոնից։

Աղբյուրի փոխանցմամբ` այդ ամենով պայմանավորված` կատալոնական ակումբը կապ է հաստատել Ռոբերտո Մարտինեսի հետ, ով գլխավորում է Բելգիայի հավաքականը։

Կողմերի միջև դեռևս պաշտոնական բանակցություններ չեն սկսվել, սակայն «Բարսելոնայի» ներկայացուցիչները նրան հարցրել են, թե ինչպես է վերաբերվում «բլաուգրանասը» գլխավորելու գաղափարին։

Ինքը` Մարտինեսը, հետաքրքրված է «Բարսելոնայի» գլխավոր մարզիչ նշանակվելու գաղափարով, ինչի ասին արդեն տեղյակ է պահել Բելգիայի ֆուտբոլի ֆեդերացիայի ղեկավարությանը։

Հաղորդվում է, որ 48-ամյա մասնագետը ներկա պահին համարվում է «Բարսելոնան» գլխավորելու հիմնական թեկնածուն։

Իսպանացի մասնագետը, սակայն, չի ցանկանում Բելգիայի հավաքականից հեռանալ մինչև Ազգերի լիգայի հանդիպումները։ «Կարմիր սատանաները» հոկտեմբերի 7-ին մրցաշարի կիսաեզրափակիչի շրջանակում մրցելու են Ֆրանսիայի ընտրանու դեմ, իսկ հաղթանակի դեպքում ամսի 10-ին էլ եզրափակիչ հանդիպմանը կմասնակցեն։

Կատալոնական ակումբը Մարտինեսին ասել է, որ պատրաստ է սպասել մինչև Ազգերի լիգայի ավարտը ։

Հիշեցնենք` ավելի վաղ նշվում էր, որ «Բարսելոնան» դիտարկում է նաև Թիերի Անրիի տարբերակը, ով Բելգիայի հավաքականում Մարտինեսի օգնականն է։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am