Աբրահամը շարունակում է հերոսանալ` Ռոմային դուրս բերելով ԿԼ-ի 1/4 եզրափակիչ🎥

Կոնֆերենցիաների լիգայի 1/8 եզրափակիչի պատասխան հանդիպման շրջանակում «Ռոման» սեփական հարկի տակ մրցեց հոլանդական «Վիտեսի» դեմ։

Հիշեցնենք, որ դիմակայության առաջին խաղում «գայլերը» հաղթել էին 1:0 հաշվով։

Ինչ վերաբերում է պատասխան հանդիպմանը, ապա այն հիմնականում անցավ հյուրերի տարածքային շոշափելի առավելության պայմաններում, ովքեր շատ ավելի լավ տեսք ունեին, քան «Ռոման»։

Այդ առավելությունն էլ տվեց իր արդյունքը. 62-րդ րոպեին ընթացքից կատարած հարվածով ֆանտաստիկ գոլի հեղինակ դարձավ Մաքսիմիլիան Վիտեկը։

Բաց թողած գոլից հետո Ժոզե Մոուրինիոյի թիմը նետվեց առաջ` փրկելու հանդիպումը։

«Գայլերը» տիրեցին նախաձեռնությանը, սակայն մինչև խաղավարտ նրանց մոտ ոչինչ չէր ստացվում։

Երբ թվում էր` «Վիտեսը» կհաղթի 1:0 հաշվով, իսկ հանդիպումը կտեղափոխվի լրացուցիչ ժամանակ, 90+1-րդ րոպեին «Ռոմայի» կազմից կրկին հերոսացավ Թեմի Աբրահամը, ով խփեց պատասխան գոլը։

Այսպիսով, հանդիպումն ավարտվեց 1:1, ինչի արդյունքում «Ռոման» ընդհանուր դիմակայությունում հաղթեց 2:1 հաշվով և նվաճեց Կոնֆերենցիաների լիգայի 1/4 եզրափակիչի ուղեգիր։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am