Հայաստանի հավաքականը խոշոր հաշվով ցավալի պարտություն կրեց Շոտլանդիայի դեմ խաղում🎥

Հայաստանի հավաքականը խոշոր հաշվով ցավալի պարտություն կրեց Շոտլանդիայի դեմ խաղում🎥

14/06/2022 - 21:54

Ազգերի լիգայի B դիվիզիոնի 1-ին խմբի 4-րդ տուրում` Երևանի Վազգեն Սարգսյանի անվան «Հանրապետական» մարզադաշտում, միմյանց դեմ մրցեցին Հայաստանի ու Շոտլանդիայի հավաքականները։

Հանդիպումը հիանալի մեկնարկեց Հայաստանի հավաքականի համար, քանի որ արդեն 7-րդ րոպեին Տիգրան Բարսեղյանը տպավորիչ անցում ձեռնարկեց հարձակման աջ եզրով և հարվածային դիրք դուրս բերեց Վահան Բիչախչյանին, ով էլ մոտ տարածությունից բացեց հաշիվը։

Այդուհանդերձ, մեր տղաների ուրախությունը շատ կարճ տևեց. 14-րդ րոպեին Ստյուարտ Արմստրոնգը խփեց շոտլանդացիների պատասխան գնդակը։

Բաց թողած գոլից հետո էլ մեր հավաքականն ավելի լավ տեսք ուներ և ստեղծեց մի քանի վտանգավոր պահեր, սակայն Տիգրան Բարսեղյանը, Վահան Բիչախչյանը, Էդուարդ Սպերցյանն ու Խորեն Բայրամյանը վրիպեցին նպաստավոր դիրքերից։

Խաղը, ինչ-որ պահից հանդարտվեց, սակայն 44-րդ րոպեին ամեն ինչ գլխիվայր շուռ եկավ Հայաստանի հավաքականի համար. Արման Հովհաննիսյանը մեկ դրվագում երկու անգամ պատժվեց դեղին քարտով ու հեռացվեց դաշտից, իսկ 45+1-րդ րոպեին Ստյուարտ Արմստրոնգը դարձավ դուբլի հեղինակ ու առաջ մղեց արդեն Շոտլանդիայի հավաքականին։

Կողմերն ընդմիջման գնացին 2:1 հաշվի պայմաններում։

Երկրորդ կեսի մեկնարկում էլ Ստյուարտ Կլարկի սաները ևս երկու գնդակ ուղարկեցին Դավիթ Յուրչենկոյի պաշտպանած դարպասը. 50-րդ ու 54-րդ րոպեներին աչքի ընկան Ջոն Մաքգինն ու Չե Ադամսը։

Ինչպես պարզվեց հետագայում, Ադամսի գոլն այս խաղում վերջինն էր. Հայաստանի հավաքականը պարտվեց խոշոր` 1:4 հաշվով։

Հավելենք, որ խաղավերջում էլ կարմի քարտով պատժվեց նաև Կամո Հովհաննիսյանը։

Այս հաղթանակից հետո Շոտլանդիան B դիվիզիոնի 1-ին խմբում վաստակեց 6 միավոր և բարձրացավ 2-րդ հորիզոնական։

Հայաստանի հավաքականը, 3 միավորով, վերջինն է, 4-րդը։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

# , , , , , , , , , , , ,

Մեջբերումներ անելիս ակտիվ հղումը Interfootball.am-ին պարտադիր է: Կայքի հոդվածների մասնակի կամ ամբողջական հեռուստառադիոընթերցումն առանց Interfootball.am-ին հղման արգելվում է: Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:

© Interfootball.am 2022