Ինտեր Մայամին թրիլլերային խաղում հաղթեց Ցինցինատիին` դուրս գալով ԱՄՆ գավաթի եզրափակիչ🎥

ԱՄՆ գավաթի կիսաեզրափակիչում «Ինտեր Մայամին» հյուրընկալվելիս մրցեց «Ցինցինատիի» դեմ։

Հանդիպումը բավական ծանր ընթացք ստացավ Ֆլորիդա նահանգից ժամանած հյուրերի համար, ովքեր արդեն 53-րդ րոպեին պարտվում էին 0:2 հաշվով։

«Ցինցինատիի» գոլերը խփեցին Լուչիանո Ակոստան ու Բրենդոն Վասկեսը։

Այդուհանդերձ, Խերարդո Մարտինոյի թիմը բեկեց հանդիպման ընթացքն ու կարողացավ փրկել այն` տեղափոխելով լրացուցիչ ժամանակ։

68-րդ րոպեին Լեո Մեսսիի իրացրած տուգանային հարվածից հետո Լեոնարդո Կամպանան կրճատեց հաշիվը։

90+7-րդ րոպեին էլ Մեսսին իր ֆանտաստիկ փոխանցումով կրկին հարվածային դիրք դուրս բերեց Կամպանային, ով գլխի դիպուկ հարվածով խփեց «Ինտեր Մայամիի» երկրորդ պատասխան գոլը։

93-րդ րոպեին Ջոզեֆ Մարտինեսն առաջ մղեց արդեն հյուրերին, սակայն «Ցինցինատիի» տղաներն իրենց մեջ ուժ գտան և 113-րդ րոպեին Յույա Կուբոյի ջանքերով լուսատախտակին կրկին հավասար հաշիվ վառեցին` 3:3։

Լրացուցիչ ժամանակն այդ հաշվով էլ ավարտվեց, ինչից հետո նշանակվեց 11-մետրանոց հարվածաշար, որն ավելի դիպուկ իրացրին «Ինտեր Մայամիի» ֆուտբոլիստները` հաղթելով 5:4 հաշվով։

Վճռորոշ դարձավ «Ցինցինատիի» կենտրոնական պաշտպան Նիկ Հագլունդի վրիպումը, ում հարվածից հետո «Ինտեր Մայամիին» փրկեց դարպասապահ Դրեյք Կալենդերը։

Նշենք, որ 25-ամյա դարպասապահն, առհասարակ, հանդիպման հերոսներից էր, ով քանիցս փրկեց իր թիմին` կատարելով 6 սեյվ։

Այսպիսով, Խերարդո Մարտինոյի թիմը թրիլլերային պայքարում հաղթեց «Ցինցինատիին» և դուրս եկավ ԱՄՆ գավաթի եզրափակիչ, որի շրջանակում սեպտեմբերի 28-ին մրցելու է «Հյուսթոն Դինամոյի» դեմ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am