Ռեալը վերադառնում է․ «արքայական» ակումբը փայլուն կերպով ուշքի է գալիս անհաջողություններից հետո 🎥

Իսպանական Լա լիգայի 20-րդ տուրի շրջանակում գործող չեմպիոն «Ռեալը» հյուրընկալվելիս մրցեց «Ալավեսի» դեմ։

«Արքայական» ակումբը հիանալի հանդիպում անցկացրեց և արդեն առաջին խաղակեսում վճռեց հանդիպման ելքը։

Խաղի հաշիվը 15-րդ րոպեին բացեց Կազեմիրոն, իսկ նախքան ընդմիջման գնալը 41 ու 45+1-րդ րոպեներին համապատասխանաբար աչքի ընկան Կարիմ Բենզեման ու Էդեն Ազարը։

Բելգիացի վինգերը պաշտոնական խաղերում վերջին անգամ գոլի հեղինակ դարձել էր 2020 թվականի նոյեմբերի 25-ին, երբ Չեմպիոնների լիգայի ընթացիկ խաղարկության խմբային փուլի 4-րդ տուրի շրջանակում գրավեց «Ինտերի» դարպասը։

30-ամյա ֆուտբոլիստի գոլային դրվագում հատկապես տպավորիչ ստացվեց Տոնի Կրոսի կատարած գոլային փոխանցումը, ով գնդակը «կախեց» մրցակցի ֆուտբոլիստների վրայով՝ «կտրելով» ողջ պաշտպանությունը։

Երկրորդ կեսը, հիմնականում, հանգիստ պայքարում էր մեկնարկել, սակայն 59-րդ րոպեին «Ալավեսի» ֆուտբոլիստներին հաջողվեց մեկ գնդակ հետ բերել։ Լուկաս Պերեսի՝ տուգանային հարվածից կատարած փոխանցումից հետո Խոսելուն հաշիվը դարձրեց 1։3։

70-րդ րոպեին, սակայն, Զինեդին Զիդանի սաները վերականգնեցին երեք գնդակի առավելությունը, իսկ Կարիմ Բենզեման էլ իր անվան դիմաց դուբլ գրանցեց։

Այդ գոլի շնորհիվ ֆրանսիացի հարձակվողը Լա լիգայի ընթացիկ մրցաշրջանում գոլերի քանակը հասցեց 10-ի և լավագույն ռմբարկուների պայքարում «Վիլյառեալի» հարձակվող Ժերար Մորենոյի հետ կիսում է 4-5-րդ տեղը։ Լավագույն ռմբարկուն «Սևիլիայի» մարոկկացի գոլահար Յուսուֆ Էն-Նեսիրին է, ով ընթացիկ տուրի խաղում երեք անգամ գրավեց «Կադիսի» դարպասը․ նրա անվան դիմաց կա 12 գոլ։

Այսպիսով, «Ռեալի» ֆուտբոլիստներն ընդհատում են անհաջող հանդիպումների շարքը։ Մադրիդյան ակումբը վերջին երեք պաշտոնական խաղերում չէր ճաշակել հաղթանակի բերկրանքը․ մադրիդցիները Լա լիգայի շրջանակում չէին կարողացել հաղթել «Օսասունային» (0։0), ինչպես նաև նույն՝ 1։2 հաշվով Իսպանիայի գավաթի ու Սուպեր գավաթի շրջանակում համապատասխանաբար պարտվել էին «Ատլետիկ Բիլբաոյին» ու Սեգունդա Բ-ն ներկայացնող «Ալկոյանոյին»։

«Ռեալն» այս հաղթանակից հետո վաստկեց 40 միավոր և շարունակում է զբաղեցնել 2-րդ հորիզոնականը՝ 4 միավոր զիջելով «Ատլետիկոյին», որը դեռևս երկու հանդիպում պակաս է անցկացրել, իսկ «Ալավեսը» 18 միավորով 17-րդն է։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am