Գամբիայի գլխավոր մարզիչ. «Եթե ևս 30 րոպե թռչեինք, բոլորը կմահանային»

Գամբիայի հավաքականն անախորժ իրավիճակում է հայտնվել և չի կարողացել մեկնել Կոտ դ’Իվուար,, որտեղ հունվարի 13-ին մեկնարկելու է Աֆրիկայի ազգերի գավաթի հերթական խաղարկությունը։

Բանն այն է, որ Գամբիայի հավաքականին տեղափոխող ինքնաթիռն օդ բարձրանալուց ընդամենը 9 րոպե անց կտրուկ շրջադարձ է կատարել` հետ վերադառնալով օդանավակայան։

Հետագայում պարզ է դարձել, որ օդանավը սպասարկող անձնակազմը տեխնիակական խնդիր է հայտնաբերել։

Նշվում է, որ օդանավում ճնշման և թթվածնի պակաս է եղել։

Գամբիայի հավաքականի գլխավոր մարզիչ Թոմ Սենֆյեթը խոսել է կատարվածի մասին.

«Սա խելագարություն է։ Եթե ևս 30 րոպե թռչեինք, բոլորը կմահանային»,- 50-ամյա մասնագետի խոսքերը մեջբերում է լրագրող Սաշա Տովոլիերին։

Հաղորդվում է, որ Գամբիայի ֆուտբոլի ֆեդերացիան փորձում է Կոտ դ’Իվուար հասնելու այլընտրանքային ելք գտնել, որպեսզի հավաքականը հնարավորինս շուտ հասնի մրցման վայր։

Ավելացնենք, որ Գամբիան Աֆրիկայի ազգերի գավաթի խաղարկությունում ընդգրկված է C խմբում, որի շրջանակում կմրցի Սենեգալի, Կամերունի և Գվինեայի դեմ։

Գամբիացները մրցաշարի շրջանակում առաջին հանդիպումը կանցկացնեն հունվարի 15-ին և կմրցի Սենեգալի դեմ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am