«Ռամոն Սանչես Պիսխուանում» կրքերը թեժ էին. Սևիլիան ու Բարսան կիսեցին միավորը🎥

Իսպանական Լա լիգայի շրջանակում կայացավ 4-րդ տուրից հետաձգված «Սևիլիա» – «Բարսելոնա» հանդիպումը։

Հանդիպման մեկնարկում, ճիշտ է, գնդակին տիրելու տեսանկյունից հավասար պայքար էր դաշտում, սակայն «Բարսելոնան» խաղային առավելություն ուներ։

Այդուհանդերձ, խաղի հաշիվը բացեցին տանտերերը. 32-րդ րոպեին անկյունայինի խաղարկումից հետո աչքի ընկավ Ալեխանդրո Պապու Գոմեսը։

Ամեն դեպքում, կողմերն ընդմիջման գնացին հավասար հաշվի պայմաններում. 45-րդ րոպեին իր` հաջող իրացրած անկյունայինով պատասխանեց արդեն «Բարսելոնան», իսկ գոլի հեղինակ դարձավ Ռոնալդ Արաուխոն։

Երկրորդ խաղակեսի մեկնարկը նույնպես անցնում էր հավասար պայքարում, սակայն 63-րդ րոպեին կրքերն անսպասելի սրվեցին։

Փոքրիկ բախում տեղի ունեցավ Ժյուլ Կունդեի («Սևիլիա») և Ժորդի Ալբայի («Բարսելոնա») միջև, սակայն ֆրանսիացի պաշտպանի նյարդերը տեղի տվեցին, ինչից հետո գնդակով միտումնավոր հարվածեց Ալբայի դեմքին։

Այդ դրվագը չվրիպեց հանդիպման գլխավոր մրցավար Կառլոս Դել Սերո Գրանդեի ուշադրությունից և միանգամից կարմիր քարտով պատժեց Կունդեին` հեռացնելով նրան դաշտից։

Ստանալով քանակական առավելություն` Խավիի թիմը նետվեց առաջ` հաղթանակ կորզելու։

Հյուրերը ստեղծեցին մի շարք իրական գոլային պահեր, սակայն անդալուսական ակումբի պաշտպանները հետ էին մղում «Բարսելոնայի» գրոհները։

Կարելի է առանձնազնել հատկապես 84-րդ րոպեին Ուսման Դեմբելեի դրվագը, երբ ֆրանսիացի վինգերի հարվածից հետո գնակը դիպավ դարպասաձողին։

Ի վերջո հանդիպումն ավարտվեց 1:1 հաշվով։

Այս ոչ-ոքիից հետո «Սևիլիան» վաստակեց 38 միավոր և զբաղեցնում է 2-րդ հորիզոնականը։

«Բարսելոնան», 28 միավորով, 7-րդն է։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am