Չի խանգարում նույնիսկ մեկ ֆուտբոլիստի պակասը․ Միլանը մրցակիցներ չի ճանաչում 🎥

Իտալական Ա սերիայի 15-րդ տուրի շրջանակում առաջնության առաջատար «Միլանը» հյուրընկալվելիս մրցեց «Բենեվենտոյի» դեմ։

Միլանյան ակումբը շարունակում է փայլել՝ հաղթելով 0։2 հաշվով։

Խաղի հաշիվը բացվեց 15-րդ րոպեին, երբ «ռոսոներիները» 11-մետրանոց հարված վաստակեցին, որն անվրեպ իրացրեց Ֆրանկ Կեսիեն՝ առաջ մղելով իր թիմին։

Հանդիպման 34-րդ րոպեից «Միլանը» խաղը շարունակեց 10 ֆուտբոլիստով։ Կոպիտ խաղի համար խաղադաշտից հեռացվեց Սանդրո Տոնալին։

«Միլանին» չխանգարեց նույնիսկ մեկ ֆուտբոլիստի պակասը և 49-րդ րոպեին Ռաֆայել Լեաուի ջանքերով հաշիվը դարձավ 0։2։

61-րդ րոպեին հանդիպման գլխավոր մրցավար Ֆաբրիսիո Պասկան այս անգամ արդեն 11-մետրանոց հարված նշանակեց «Միլանի» դարպասին, սակայն Ջանլուկա Կապրարիի հարվածը շեղ է ստացվում։

Խաղավարտին մոտ երկու ակումբներն էլ աչքի ընկնելու հնարավորություններ ունեին, սակայն հաշվի մեջ այդպես էլ փոփոխություն չեղավ և «Միլանը» հաղթեց 0։2 հաշվով։

«Միլանն» այս հաղթանակից հետո վաստակեց 37 միավոր, շրջանցեց «Ինտերին» և կրկին բարձրացավ 1-ին հորիզոնական։ «Ներաձուրիներն» իրենց ակտիվում ունեն 36 միավոր, իսկ «Բենեվենտոն» 18 միավորով 10-րդն է։