Բույուկեքշի.«Սա ամոթալի գիշեր է թուրքական ֆուտբոլի համար»

Ինչպես արդեն տեղեկացրել ենք, թուրքական Սուպերլիգայի 15-րդ տուրում կայացած «Անկարագյուջյու» – «Ռիզեսփոր» (1:1) հանդիպումից հետո սկանդալային իրադարձություններ են տեղի ունեցել։

Հանդիպման ավարտից հետո «Անակարագյուջյուի» նախագահ Ֆարուկ Կոջան մոտեցել և բռունցքով հարվածել է գլխավոր մրցավար Հալիլ Ումուտ Մելերին։

37-ամյա մրցավարն ընկել է խոտածածկին, ինչից հետո ոմանք սկսել են ոտքերով հարվածներ հասցնել նրան։

Դեպքի առթիվ Թուրքիայի ֆուտբոլի ֆեդերացիան անորոշ ժամանակով հետաձգել է Սուպերլիգայի հետագա բոլոր հանդիպումները։

Կատարվածի մասին խոսել է Թուրքիայի ֆուտբոլի ֆեդերացիայի նախագահ Մեհմեթ Բույուկեքշին.

«Սա ամոթալի գիշեր է թուրքական ֆուտբոլի համար։

Ֆուտբոլային հանդիպումները պատերազմ չեն։ Մենք բոլորս պետք է հասկանանք, որ բոլոր ակումբները չեն կարող միաժամանակ չեմպիոն դառնալ։

Կատարվածի առթիվ հորդորում ենք բոլորին պատասխանատվություն ստանձնել։

«Անկարագյուջյուի» նախագահին և ղեկավարներին սպառնում են ամենադաժան պատիժները»,- նշել է Բույուկեքշին, ում խոսքերը մեջբերում է The Athletic-ը։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am