Բարսայի ապագան. 5 փաստ Պեդրիի մասին

Բարսայի ապագան. 5 փաստ Պեդրիի մասին

20/03/2022 - 00:56

Դեռ 18 տարեկանում Պեդրին հայտնվել էր ողջ Եվրոպայի ուշադրության կենտրոնում` գերազանցելով բոլորի սպասելիքները։ Նա նույնիսկ ճանաչվեց Եվրո-2020-ի լավագույն երիտասարդ ֆուտբոլիստ։

Այժմ կներկայացնենք 5 փաստ Պեդրիի մասին։

1. Պեդրիի մանկության կուռքը եղել է Անդրես Ինիեստան

Երիտասարդ ֆուտբոլիստը բազմիցս նշել է, թե ինչու է մանկուց երկրպագում «Բարսելոնային» և դրա պատճառը Անդրես Ինիեստան է։

Ամեն դեպքում, նրա ընտանիքը վաղուց երկրպագում է կատալոնական ակումբին։ Պեդրիի պապիկը հիմնադրել է երկրպագուների միավորում` անվանելով այն «Տեներիֆե-Տեգեստե Բարսելոնա»։

2. Պեդրին «Լաս Պալմասի» կազմում գոլի հեղինակ դարձած ամենաերիտասարդ ֆուտբոլիստն է

«Լաս Պալմասը» Պեդրիի առաջին պրոֆեսիոնալ ակումբն է, որի կազմում 2019 թ. սեպտեմբերի 19-ին Սեգունդայի շրջանակում գրավեց «Սպորտինգ Խիխոնի» դարպասը` հաղթանակ պարգևելով իր թիմին 1:0 հաշվով։

Պեդրին, այդ գոլի շնորհիվ, դարձավ «Լաս Պալմասի» կազմում երբևէ գոլի խփած ամենաերիտասարդ ֆուտբոլիստը։ Նա այդ օրը 16 տարեկան, 9 ամսական և 23 օրական էր։

3. Պեդրին Լա լիգայի պատմության ամենաերիտասարդ ֆուտբոլիստն է, ով մեկ խաղում դարձել է գոլի և գոլային փոխանցման հեղինակ

Չնայած երիտասարդ տարիքին` Պեդրին հասցրել է պատմություն կերտել նաև Լա լիգայում։

2021 թ. հունվարի 6-ին 2-րդ տուրից հետաձգված «Ատլետիկ Բիլբաո» 2:3 «Բարսելոնա» խաղում Պեդրին 18 տարեկան և 42 տարեկան օրական հասակում դարձավ Լա լիգայի պատմության ամենաերիտասարդ ֆուտբոլիստը, ով մեկ խաղում դարձել է գոլի և գոլային փոխանցման հեղինակ։

4. Պեդրին միակ ֆուտբոլիստն է, ով մեկ մրցաշրջանում երկու անգամ գոլային փոխանցում է կատարել կրնկով

Երկու դեպքում էլ երիտասարդ ֆուտբոլիստը կրնկով գոլային փոխանցում կատարել է Լեո Մեսսիին։

Ընդ որում, «Վալյադոլիդի» դեմ խաղում (3:0) Պեդրիի կրնկով կատարած ասիստից հետո Մեսսին ակումբային մակարդակում խփած գոլերի քանակով շրջանցեց Պելեին։

5. Պեդրին ֆուտբոլով սկսել է զբաղվել եղբոր` Ֆերնանդոյի շնորհիվ

Ֆերնանդոյի մարզիչը խնդրեց Պեդրիին միանալ թիմերից մեկին, երբ նա ընդամենը 4 տարեկան էր։

Եղբայրների միջև կապը մինչ օրս էլ շատ ամուր է. նրանք միասին են բնակվում Բարսելոնայում։

# , , , , ,

Մեջբերումներ անելիս ակտիվ հղումը Interfootball.am-ին պարտադիր է: Կայքի հոդվածների մասնակի կամ ամբողջական հեռուստառադիոընթերցումն առանց Interfootball.am-ին հղման արգելվում է: Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:

© Interfootball.am 2023