Վիլյառեալը պաշտոնական հայտարարությամբ է հանդես եկել` կապված Վալվերդեի և Բաենայի միջադեպի հետ

Իսպանական Լա լիգայի 28-րդ տուրում «Վիլյառեալը» հյուրընկալվելիս 3:2 հաշվով հաղթեց «Ռեալ Մադրիդին»։

Ինչպես արդեն տեղեկացրել ենք, այդ խաղից հետո արտառոց միջադեպ է տեղի ունեցել. «արքայական» ակումբի կիսապաշտպան Ֆեդե Վալվերդեն «Սանտիագո Բերնաբեու» մարզադաշտի ավտոկայանատեղիում հարձակվել և հարվածել է «դեղին սուզանավի» հարձակվող Ալեքս Բաենայի դեմքին։

«Վիլյառեալը» կատարվածի առթիվ հանդես է եկել պաշտոնական հայտարարությամբ.

««Վիլյառեալի» ֆուտբոլիստ Ալեքս Բաենան երեկ երեկոյան հարձակման է ենթարկվել «Սանտյագո Բերնաբեու» մարզադաշտում «Ռեալի» դեմ կայացած խաղից հետո թիմի ավտոբուս նստելու պահին։

Իրավիճակով պայմանավորված՝ Բաենան որոշել է հարձակվողի դեմ բողոք ներկայացնել ոստիկանություն։

«Վիլյառեալը» ցանկանում է ևս մեկ անգամ հիշեցնել, որ դեմ է բռնության ցանկացած գործողության։ Ակումբը հաստատապես հավատում է իրադարձությունների խաղացողի վարկածին և կաջակցի նրան այս գործընթացի ընթացքում»,- նշված է «դեղին սուզանավի» տարածած պաշտոնական հայտարարության մեջ։

Հավելենք, որ, ըստ տարածված տեղեկությունների, Բաենան «Ռեալի» և «Վիլյառեալի» միջև կայացած վերջին երկու խաղերում ծաղրել է Վալվերդեի ընտանիքին և կատակել նրա կնոջ` Մինա Բոնինոյի հղիության վերաբերյալ, ինչը հունից հանել է ուրուգվայցի ֆուտբոլիստին։

Սույն թվականի տարեսկզբին տեղեկություններ կային, թե Վալվերդեն և Բոնինոն կորցրել են իրենց երեխային, սակայն, բարեբախտաբար, նրա կյանքը հաջողվեց փրկել։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am