Սերգեյ Միլինկովիչ-Սավիչը մոտ է ակումբային գրանցումը փոխելուն

«Լացիոյի» կենտրոնական կիսապաշտպան Սերգեյ Միլինկովիչ-Սավիչն, ամենայն հավանականությամբ, ընթացիկ տրանսֆերային պատուհանի ժամանակ կփոխի ակումբային գրանցումը։

Ինսայդեր Ֆաբրիցիո Ռոմանոն հայտնում է, որ սերբ ֆուտբոլիստի ծառայություններով հետաքրքրված է Սաուդյան Արաբիայի Պրեմիեր լիգան ներկայացնող «Ալ Հիլալը»։

Նշվում է, որ «Ալ Հիլալը» 28-ամյա ֆուտբոլիստի դիմաց «արծիվներին» առաջարկել է 40 մլն եվրո։

Lazio News 24-ը, հղում կատարելով La Repubblica-ին, տեղեկացնում է, որ Միլինկովիչ-Սավիչն արդեն ընդունել է «Ալ Հիլալի» շահավետ առաջարկը, որը պատրաստ է նրան վճարել տարեկան 20 մլն եվրո աշխատավարձ։

Այժմ սաուդարաբական ակումբը պետք է փորձի գործարքի հարցում համաձայնության հասնի նաև «Լացիոյի» հետ։

Corriere dello Sport-ը հաստատում է, որ սերբ ֆուտբոլիստը լրջորեն դիտարկում է կարիերան Եվրոպայի սահմաններից դուրս շարունակելու տարբերակը։

Հաղորդվում է, որ «Լացիոյի» սեփականատեր Կլաուդիո Լոտիտոն արել է հնարավոր ամեն ինչ, որպեսզի Միլինլովիչ-Սավիչը չհեռանա ակումբից, սակայն վերջինս արդեն կայացրել է իր որոշումը։

Հավելենք, որ Սերգեյ Միլինկովիչ-Սավիչը «Լացիոյի» կազմում հանդես է գալիս 2015 թ. օգոստոսից` անցկացրած 341 խաղում դառնալով 69 գոլի և 59 գոլային փոխանցման հեղինակ։

Հիշեցնենք, որ վերջերս «Ալ Հիլալի» շարքերը համալրել են նաև «Չելսիի» կենտրոնական պաշտպան Կալիդու Կուլիբալին և «Վուլվերհեմպտոնի» կիսապաշտպան Ռուբեն Նևեշը։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am