Ռոմայի երկրպագուները հետապնդել են Ձանիոլոյին և մահվան սպառնալիքներ հնչեցրել նրա հասցեին

Ռոմայի երկրպագուները հետապնդել են Ձանիոլոյին և մահվան սպառնալիքներ հնչեցրել նրա հասցեին

31/01/2023 - 21:45

«Ռոմայի» կիսապաշտպան Նիկոլո Ձանիոլոն ծանր օրեր է ապրում։

Ինչպես տեղեկացնում է Rai Sport-ը, իտալական Ա սերիայի 20-րդ տուրում կայացած «Նապոլի» – «Ռոմա (2:1) հանդիպումից հետո «գայլերի» մի շարք երկրպագուներ սկսել են հետապնդել 23-ամյա կիսապաշտպանի մեքենան և նրա հասցեին հնչեցրել մահվան սպառնալիքներ ու տարբեր վիրավորանքներ։

Ձանիոլոն, ով «Ռոմայի» ղեկավարության հետ ունեցած տարաձայնությունների պատճառով բաց է թողել այդ հանդիպումը և մնացել Հռոմում, ստիպված է եղել ոստիկանություն կանչել, ինչից հետո էլ իրավապահ մարմինները հարթել են ստեղծված իրավիճակը։

Հիշեցնենք, որ հռոմեական ակումբը ցանկանում է վաճառել Ձանիոլոյին։ Նրա տրանսֆերն իրականացնելուն ամենամոտն անգլիական «Բորնմութն» է, որը գործարքի հարցում համաձայնության է հասել «Ռոմայի» հետ (30+5 մլն եվրո և 10% մասնաբաժին ֆուտբոլիստի հետագա վաճառքից), սակայն, ինքը` Ձանիոլոն, չի ցանկանում համալրել «բալերի» շարքերը։

Այդ ամենի հետևանքով հռոմեական ակումբի ղեկավարությունը վերջնագիր է ներկայացրել Ձանիոլոյին. կա՛մ նա պետք է ընդունի «Բորնմութի» առաջարկը կա՛մ էլ մինչև «ջալոռոսիների» հետ գործող պայմանագրի ավարտը հեռացվում է թիմից ու չի մասնակցում հանդիպումներին։

Նշենք, որ կան տեղեկություններ նաև, որ տրանսֆերային պատուհանի վերջին օրն իտալացի կիսապաշտանն, ամեն դեպքում, մտադիր է ընդունել «Բորնմութի» առաջարկը։

Վերջում ավելացնենք, որ «Ռոմայի» ու 23-ամյա կիսապաշտպանի գործող պայմանագիրն ավարտվում է 2024 թ. հունիսի 30-ը։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

# , , , , ,

Մեջբերումներ անելիս ակտիվ հղումը Interfootball.am-ին պարտադիր է: Կայքի հոդվածների մասնակի կամ ամբողջական հեռուստառադիոընթերցումն առանց Interfootball.am-ին հղման արգելվում է: Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:

© Interfootball.am 2023