Բավարիան փոխարինող է փնտրում ծանր վնասվածք ստացած Նոյերի համար

Բավարիան փոխարինող է փնտրում ծանր վնասվածք ստացած Նոյերի համար

11/12/2022 - 12:43

«Բավարիայի» և Գերմանիայի հավաքականի դարպասապահ Մանուել Նոյերն Instagram-ի իր էջում հայտնել է, որ ծանր վնասվածք է ստացել դահուկ քշելու ժամանակ.

«Է՜հ ընկերներ, ի՞նչ ասեմ… տարվա ավարտը միանշանակ կարող էր ավելի լավ ստացվել։

Մինչ ես փորձում էի «մաքրել» գլուխս դահուկ քշելու միջոցով, ոտքի կոտրվածք ստացա։ Վիրահատությունն անցել է բարեհաջող, ինչի համար անչափ շնորհակալ եմ բժշիկներին, սակայն դժվար է ընդունել, որ մրցաշրջանն ինձ համար ավարտված է»,- գրել է 36-ամյա դարպասապահը։

Ինսայդեր Նիկոլո Սկիրան տեղեկացնում է, որ մյունխենյան ակումբն արդեն փոխարինող է փնտրում Նոյերի համար։

Աղբյուրի փոխանցմամբ` «Բավարիան» դիտարկում է վերադարձնել Ալեքսանդր Նյուբելին, ով այժմ վարձավճարով հանդես է գալիս «Մոնակոյի» կազմում։

Նյուբելի ու մոնեգասկյան ակումբի միջև վարձակալական պայմանագիրն ուժի մեջ է մինչև 2023 թ. հունիսի 30-ը, սակայն «Բավարիան» կարող է ժամանակից շուտ խզել այն ու վերադարձնել իր դարպասապահին։

Բացի դրանից, «Բավարիան» հարցում է ուղարկել նաև «Դինամո Զագրեբին»` Խորվաթիայի հավաքականի դարպասապահ Դոմինիկ Լիվակովիչի տրանսֆերային պայմաններին ծանոթանալու համար։

Նշենք, որ Լիվակովիչն ընթացիկ աշխարհի առաջնության լավագույն դարպասապահներից մեկն է` մեկ խաղում միջինը կատարելով 4 սեյվ։

27-ամյա դարպասապահը 1/4 եզրափակիչի շրջանակում կայացած Խորվաթիա – Բրազիլիա (1:1, 11 մ – 4:2) խաղում կատարեց 11 սեյվ, իսկ հետխաղյա 11-մետրանոցների ժամանակ հետ մղեց «պենտակամպիոնների» հարձակվող Ռոդրիգոյի հարվածը։

Լիվակովիչը 2015 թ. օգոստոսից հանդես է գալիս «Դինամո Զագրեբի» կազմում` անցկացրած 262 խաղում 122 անգամ դարպասը պահելով անառիկ։

Ինչ վերաբերում է Ալեքսանդր Նյուբելին, 26-ամյա դարպասապահը «Բավարիայի» շարքերը համալրել է 2020 թ. ամռանը, որի կազմում անցկացրել է 4 հանդիպում` 1 անգամ դարպասը պահելով անառիկ։

2021 թ. հուլիսին գերմանացի դարպասապահը վարձավճարով տեղափոխվել է «Մոնակո», որի կազմում մինչ օրս դաշտ է դուրս եկել 72 անգամ` անցկացնելով 20 «չոր» հանդիպում։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

# , , , , , , , , , , , , ,

Մեջբերումներ անելիս ակտիվ հղումը Interfootball.am-ին պարտադիր է: Կայքի հոդվածների մասնակի կամ ամբողջական հեռուստառադիոընթերցումն առանց Interfootball.am-ին հղման արգելվում է: Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:

© Interfootball.am 2023