Բավարիայի պաշտպանը խուսափել է ազատազրկումից

Բավարիայի պաշտպանը խուսափել է ազատազրկումից

27/10/2021 - 17:19

«Բավարիայի» պաշտպան Լյուկա Էրնանդեսը խուսափել է 6 ամսվա ազատազրկումից` կապված 2017 թ. դատարանի կայացրած որոշումը խախտելու հետ։

Ինչպես տեղեկացնում է Marca-ն, դատարանը որոշել է բավարարել ֆրանսիացի պաշտպանի փաստաբանների բողոք-դիմումը և դրա փոխարեն նրան դատապարտել է 4 տարվա պայմանական ազատազրկման։

Բացի դրանից, 25-ամյա ֆուտբոլիստը 240 օր անընդմեջ 400 եվրո տուգանք պետք է վճարի, որն ամբողջությամբ կկազմի 96 հազար եվրո։

Հիշեցնենք, որ 2017 թ. փետրվարին Լյուկա Էրնանդեսը, երբ հանդես էր գալիս «Ատլետիկո Մադրիդի» կազմում, ձերբակալվել էր իր կնոջ` Ամելիա դե լա Օսա Լյորենտեի վրա հարձակման մեղադրանքով։

Այդ ժամանակ դատարանը թե՛ Էրնանդեսին և թե՛ Լյորենտեին դատապարտեց հասարակական աշխատանքների և տուգանեց։

Դատարանը նրանց արգելել էր նաև 6 ամիս չհանդիպել միմյանց հետ, սակայն 2017 թ. հունիսին զույգը միասին ուղևորվում է Բահամյան Կղզիներ, որտեղ էլ ամուսնանում են, և Մադրիդ վերադառնալուց հետո երկուսն էլ ձերբակալվում են։

Այդ ժամանակ Էրնանդեսը մեղադրվեց դատարանի խափանման միջոցը խախտելու համար, ինչից հետո գործը քննող դատախազը պահանջում էր ֆուտբոլիստին դատապարտել նրան 1 տարվա ազատազրկման։

2021 թ. հոկտեմբերի հայտնի դարձավ, որ, վերոնշյալ գործի հետ կապված, դատարանը որոշել է Լյուկա Էրնանդեսին դատապարտել 6 ամսվա ազատազրկման։

Ֆուտբոլիստին կարգադրված էր մինչև հոկտեմբերի 19-ը մեկնել Մադրիդ, որպեսզի որոշի, թե որ քրեակատարողական հիմնարկում է ցանկանում կրել պատիժը։

Հավելենք, որ դատարանը վերջանական վճիռը կայացնելիս ֆուտբոլիստին մեղադրել է ոչ թե կնոջ վրա հարձակվելու, այլ դատարանի` նախօրոք որոշած խափանման միջոցը խախտելու համար։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

# , ,

Մեջբերումներ անելիս ակտիվ հղումը Interfootball.am-ին պարտադիր է: Կայքի հոդվածների մասնակի կամ ամբողջական հեռուստառադիոընթերցումն առանց Interfootball.am-ին հղման արգելվում է: Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:

© Interfootball.am 2023