Հերթական դրաման! Գանան գոլառատ և անչափ համառ պայքարում հաղթեց Հվ. Կորեային 🎥

Հերթական դրաման! Գանան գոլառատ և անչափ համառ պայքարում հաղթեց Հվ. Կորեային 🎥

28/11/2022 - 19:03

ԱԱ-2022-ի H խմբի 2-րդ տուրում Գանայի հավաքականը մրցեց Հարավային Կորեայի դեմ։

«Սև աստղերը» հանդիպումը բավական վստահ սկսեցին և նախքան ընդմիջում երկու անպատասխան գնդակ ուղարկեցին հարավկորեացիների դարպասը. 24-րդ ու 34-րդ րոպեներին աչքի ընկան համապատասխանաբար Մոհամեդ Սալիսուն ու Մոհամեդ Քուդուսը։

Պաուլու Բենտուի թիմը, որն առաջին խաղակեսում գրեթե ոչնչով աչքի չընկավ, երկրորդ խաղակեսում կերպարանափոխված տեսք ուներ և կարողացավ բեկել հանդիպման ընթացքն` շատ արագ ոչ միայն կրճատելով, այլև հավասարեցնելով հաշիվը. 58-րդ ու 61-րդ րոպեներին երկու անգամ գոլի հեղինակ դարձավ Չո Գյուսոնը։

Այդուհանդերձ, հարավկորեացիների ուրախությունը շատ կարճ տևեց, քանի որ արդեն 68-րդ րոպեին գանացիները Քուդուսի ջանքերով կրկին առաջ անցավ հաշվի մեջ։

22-ամյա ֆուտբոլիստը, ինչպես Չո Գյուսոնը, նույնպես դարձավ դուբլի հեղինակ։

Խաղավերջում «ասիական վագրերն» ունեին խաղային հսկայական առավելություն և ամեն կերպ փորձում էին ոչ-ոքի կորզել, սակայն Գանայի դարպասապահ Լոուրենս Աթի Զիգին որոշ դրվագներում պարզապես հրաշքներ էր գործում. 25-ամյա դարպասապահը կատրեց 4 սեյվ։

Ի վերջո, Օտո Ադոյի սաները պահպանեցին հաղթական հաշիվն` անչափ համառ պայքարում առավելության հասնելով 3:2 հաշվով։

Նշենք, որ այս խմբում կկայանա ևս մեկ հանդիպում.

Պորտուգալիա – Ուրուգվայ

Այս հանդիպումից հետո H խմբի մրցաշարային աղյուսակն ունի հետևյալ տեսքը.

  1. Պորտուգալիա – 3 միավոր
  2. Գանա (անցկացրած երկու հանդիպում) – 3 միավոր
  3. Ուրուգվայ – 1 միավոր
  4. Հվ. Կորեա (անցկացրած երկու հանդիպում) – 1 միավոր

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

# , , , , , , , ,

Մեջբերումներ անելիս ակտիվ հղումը Interfootball.am-ին պարտադիր է: Կայքի հոդվածների մասնակի կամ ամբողջական հեռուստառադիոընթերցումն առանց Interfootball.am-ին հղման արգելվում է: Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:

© Interfootball.am 2022