🇮🇹Իտալիայի գավաթ. Ֆիորենտինան թրիլլերային հաղթանակ կորզեց Ատալանտայի դեմ խաղում🎥

Իտալիայի գավաթի 1/4 եզրափակիչի շրջանակում «Ֆիորենտինան» հյուրընկալվելիս մրցեց «Ատալանտայի» դեմ։

Կարելի է ասել` Ֆլորենցիան ներկայացնող ակումբը հանդիպումն սկսեց մեկ գնդակի առավելությամբ, քանի որ արդեն 9-րդ րոպեին թիկի նորեկ Կշիշտոֆ Պյոնտեկը, դիպուկ իրացնելով 11-մետրանոցը, բացեց խաղի հաշիվը։

27-րդ րոպեին Նիկոլաս Գոնսալեսը մոտ էր կրկնապատկելուն «Ֆիորենտինայի» առավելությունը, սակայն «Ատալանտային» փրկեց դարպասապահ Խուան Մուսոն։

Այդուհանդերձ, բերգամասկները կատարած առաջին իսկ դիպուկ հարվածով հավասարեցրին խաղի հաշիվը. 30-րդ րոպեին աչքի ընկավ Դավիդե Ձապակոստան։

45+1-րդ րոպեին հաշվի մեջ առաջ կարող էին անցնել արդեն տանտերերը, սակայն Ժերեմի Բոգայի հարվածից հետո գնդակը դիպավ դարպասաձողին։

Ամեն դեպքում, առաջին կեսում այլևս գոլեր չգրանցվեցին, իսկ կողմերն ընդմիջման գնացին 1:1 հաշվի պայմաններում։

Երկրորդ խաղակեսն անցավ շատ ավելի հետաքրքիր պայքարում, որն ապահովեց թրիլլերային վերջաբան։

56-րդ րոպեին Ժերեմի Բոգան, ի վերջո, խփեց իր գոլը` աչքի ընկնելով անհատական գեղեցիկ անցումից հետո, ինչից հետո «Ատալանտան» հաշիվը դարձրեց 2:1։

Թվում էր` երկրորդ գոլից հետո Ջանպիերո Գասպիերինիի սաները կհանգստացնեն հանդիպումն ու ամեն ինչ կանեն հաղթելու համար, սակայն այդ սցերանի հետ համաձայն չէին «մանուշակները», որոնց հաջողվեց բեկել հանդիպման ընթացքը։

70-րդ րոպեին «Ատալանտայի» կիսապաշտպան Տյոն Կոմպեյներսը սեփական տուգանային հրապարակում կանոնների խախտում թույլ տվեց, ինչից հետո հանդիպման գլխավոր մրցավար Միքայել Ֆաբրին ևս նեկ 11-մետրանոց նշանակեց տանտերերի դարպասին։

Նշակետին կրկին մոտեցավ Կշիշտոֆ Պյոնտեկը, ում առաջին հարվածից հետո Մուսոն հետ մղեց գնդակը, սակայն լեհ հարձակվողը երկրորդ փորձից հաշիվը դարձրեց 2:2։

79-րդ րոպեին «Ֆիորենտինան» մնաց 10 ֆուտբոլիստներով. երկրորդ դեղին քարտը ստացավ պաշտպան Լուկաս Մարտինեսը։

Երբ թվում էր` հանդիպման հիմնական ժամանակը կավարտվի 2:2 հաշվով ու խաղը կշարունակվի լրացուցիչ ժամանակում, 90+4-րդ րոպեին տուգանայինի խաղարկումից հետո Վինչենցո Իտալյանոյի թիմին հաղթանակ պարգևեց Նիկոլա Միլենկովիչը։

Այսպիսով, «Ֆիորենտինան» թրիլլերային պայքարում 3:2 հաշվով հաղթեց «Ատալանտային» ու նվաճեց Իտալիայի գավաթի կիսաեզրափակիչի ուղեգիր, որի շրջանակում կմրցի «Յուվենտուսի» դեմ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am