Տոտենհեմը մոտ է Ռեալի պաշտպանին ձեռքբերելուն
«Ռեալի» եզրային պաշտպան Սերխիո Ռեգիլոնը, ով ավարտված մրցաշրջանը վարձակալությամբ անցկացրեց «Սևիլիայի» կազմում, մոտ է «Տոտենհեմ» տեղափոխվելուն։ Լոնդոնյան ակումբը կարծես թե իսպանացի պաշտպանի տրանսֆերի հարցում առաջ է անցել «Մանչեսթեր Յունայթեդից», որը ոչ մի կերպ չի կարողանում համաձայնության հասնել «արքայական» ակումբի հետ։
Բանն այն է, որ «Ռեալը» խաղացողի դիմաց ցանկանում է ստանալ 30 մլն եվրո, ինչպես նաև Ռեգիլոնի պայմանագրում պետք է լինի խաղացողին հետ գնման իրավունք, ինչպես նաև «արքայական» ակումբը խաղացողի հաջորդ վաճառքից պետք է մասնաբաժին ունենա։ Ինչպես տեղեկացնում է The Guardian-ի լրագրող Ֆաբրիցիո Ռոմանոն, մանկունյական ակումբը պատրաստ է վճարել պահանջվող գումարը, սակայն, չի պատրաստվում պայմանագրում ներառել այդպիսի կետեր։
Աղբյուրի փոխանցմամբ՝ «Տոտենհեմն» սեպտեմբերի 15-ին 30 մլն-անոց առաջարկ է կատարել «Ռեալին», ինչպես նաև լոնդոնյան ակումբը պատրաստ է կատարել մադրիդյան ակումբի պահանջը՝ խաղացողի պայմանագրում ներառելով վերոնշյալ կետերը։
«Ռեալն» ու «Տոտենհեմը» համաձայնության են հասել․ այժմ «շնաձկները» պետք է խաղացողի հետ բանակցեն, որպեսզի անձնական պայմանագրի կետերը համաձայնեցնեն։ Հավելենք, որ Ռեգիլոնն ու «ՄՅՈՒ»-ն արդեն համաձայնեցրել էին անձնական պայմանագիրը։
Ավարտված մրցաշրջանում 23-ամյա պաշտշպանը «Սևիլիայի» հետ դարձավ Եվրոպա լիգայի հաղթող, իսկ անցկացրած 38 խաղում դարձավ 3 գոլի և 5 գոլային փոխանցման հեղինակ։