Տոնալին հերոսանում է. Միլանը դժվարությամբ կոտրեց Վերոնայի դիմադրությունը🎥

Իտալական Ա սերիայի 10-րդ տուրում գործող չեմպիոն «Միլանը» հյուրընկալվելիս մրցեց «Վերոնայի» դեմ։

«Ռոսոներիները» հանդիպման հաշիվը բացեցին բավական արագ. 9-րդ րոպեին հարձակման ձախ եզրից Ռաֆայել Լեաուի փոխանցումից հետո ինքնագոլի հեղինակ դարձավ տանտերերի կիսապաշտպան Միգել Վելոզուն։

Ստեֆանո Պիոլիի թիմի ուրախությունը կարճ տևեց, քանի որ արդեն 19-րդ րոպեին Կորայ Գյունտերը հավասարեցրեց հաշիվը։

Կողմերն ընդմիջման գնացին 1:1 հաշվի պայմաններում։

Երկրորդ խաղակեսն էլ հիմնականում անցավ հավսար պայքարում, սակայն հանդիպման վերջնամասում միլանյան ակումբը կարողացավ հաղթանակ կորզել. 81-րդ րոպեին հերոսացավ Սանդրո Տոնալին։

Այսպիսով, «Միլանը» համառ պայքարում հաղթեց 2:1 հաշվով, վաստակեց 23 միավոր և բարձրացավ 3-րդ հորիզոնական։

Նշենք, որ Ա սերիայի առաջատարը, 26 միավորով, «Նապոլին» է, իսկ 2-րդ հորիզոնականը զբաղեցնող «Ատալանտան» իր ակտիվում ունի 24 միավոր։

«Վերոնան» Ա սերիայի շրջանակում կրեց արդեն 5-րդ անընդմեջ պարտությումը, մնաց 5 միավորով և զբաղեցնում է 18-րդ հորիզոնականը։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am