Ֆանտաստիկ պերֆորմանս Հենոյի կողմից․ գոլ + երկու գոլային փոխանցում🎥

Իտալական Ա սերիայի 35-րդ տուրի շրջանակում «Ռոման» Հռոմի «Օլիմպիկո» մարզադաշտում մրցեց առաջնության ակնհայտ հետնապահ «Կրոտոնեի» դեմ։

Գոլազուրկ առաջին կեսից հետո երկրորդում «գայլերը» միացրին շարժիչները՝ 5 անպատասխան գնդակ ուղարկելով մրցակցի դարպասը։

Հռոմեական ակումբի կազմից հիանալի հանդիպում անցկացրեց Հենրիխ Մխիթարյանը, ով դարձավ գոլի և երկու գոլային փոխանցման հեղինակ։

47-րդ ու 73-րդ րոպեներին Հենոն օգնեց աչքի ընկնել համապատասխանաբար Բորխա Մայորալին և Լորենցո Պելեգրինիին, 78-րդ րոպեին արդեն ինքն աչքի ընկավ։

Ընթացիկ մրցաշրջանում հայազգի կիսապաշտպանն Ա սերիայի շրջանակում մասնակցել է արդեն 31 հանդիպման՝ դառնալով 10-ական գոլի և գոլային փոխանցման հեղինակ։

Հավելենք, որ «Ռոմայի» կազմից Մայորալն ու Պելեգրինին ևս մեկ անգամ աչքի ընկան՝ դառնալով դուբլի հեղինակ։

Այս հաղթանակից հետո Պաուլու Ֆոնսեկայի թիմը վաստակեց 58 միավոր և վերադարձավ 7-րդ հորիզոնական։

«Կրոտոնեն» մնաց 18 միավորով և եզրափակում է մրցաշարային աղյուսակը․ ակումբն արդեն դուրս է մնացել Ա սերիայից և հաջորդ մրցաշրջանում հանդես կգա Բ սերիայում։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am