Չելսին անհավանական գումար է վճարելու Կայսեդոյի տրանսֆերի դիմաց

«Չելսին» շատ մոտ է «Բրայթոնի» կիսապաշտպան Մոյզես Կայսեդոյին ձեռք բերելուն։

Ինսայդեր Ֆաբրիցիո Ռոմանոն հաստատում է, որ «ազնվականները» 21-ամյա ֆուտբոլիստի հետ «8+1» ձևաչափով անձնական պայմանագիր են համաձայնեցրել, որն ուժի մեջ կլինի մինչև 2031 թ. հունիսի 30-ը և կունենա այն ևս մեկ տարով երկարաձգելու հնարավորություն։

Աղբյուրի փոխանցմամբ` էկվադորցի կիսապաշտպանը «Չելսիի» հետ անձնական պայմանագիր դեռևս սույն թվականի մայիսին է համաձայնեցրել։ Այժմ ակումբներն աշխատում են գործարքն ավարտին հասցնելու ուղղությամբ։

Ինչպես տեղեկացնում է The Telegraph-ը, «թոշակառուները» գործարքի դիմաց «ճայերին» վճարելու են 115 մլն ֆունտ (մոտ 133 մլն եվրո)։

Այս գործարքը դառնալու է անգլիական Պրեմիեր լիգայի պատմության ամենաթանկարժեք տրանսֆերը և կգերազանցի Դեկլան Ռայսի ռեկորդը, ում դիմաց վերջերս «Արսենալը», հավելավճարները ներառյալ, «Վեսթ Հեմին» վճարել է 126 մլն եվրո։

Ավելի վաղ Կայսեդոյին ձեռք բերելուն շատ մոտ էր «Լիվերպուլը», որը գործարքի դիմաց «Բրայթոնին» առաջարկել էր 110 մլն ֆունտ (127 մլն եվրո), սակայն էկվադորցի ֆուտբոլիստը մերժեց մերսիսայդյան ակումբին` հայտնելով, որ ցանկանում է տեղափոխվել միայն «Չելսի»։

Հավելենք, որ Մոյզես Կայսեդոն «Բրայթոնի» կազմում հանդես է գալիս 2021 թ. հունվարից` անցկացրած 53 խաղում դառնալով 2 գոլի և 3 գոլային փոխանցման հեղինակ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am