«Բարսելոնան» կողմնորոշվել է Ֆլիկի փոխարինողի հարցում

«Բարսելոնան» գլխավոր մարզչի պաշտոնում Հանսի Ֆլիկի հեռանալուց հետո ուզում է նշանակել Սեսկ Ֆաբրեգասին, տեղեկացնում է As-ը։

«Բլաուգրանան» 39-ամյա մասնագետին պատրաստ է ակումբ հրավիրել 2028թ. հուլիսին, երբ կսպառվի Ֆլիկի պայմանագիրը։

Ֆաբրեգասի թեկնածությունը կատալոնական ակումբում առաջարկել է մարզական տնօրեն Դեկուն, որին աջակցում է նաև նախագահ Ժոան Լապորտայի խորհրդական Ալեխանդրո Էչևարիան։

«Կապտանռնագույնների» ղեկավարներն արդեն նախնական բանակցություններ են վարել իսպանացի մասնագետի ներկայացուցիչների հետ։

2024թ. հուլիսից Ֆաբրեգասը մարզում է «Կոմոն», որը նրա գլխավորությամբ 83 խաղում 37 հաղթանակ է տարել, գրանցել 22 ոչ-ոքի, կրել 24 պարտություն։ «Բիանկոբլուն» Իտալիայի Ա սերիայի ավարտված մրցաշրջանում 71 միավորով 4-րդ տեղն է զբաղեցրել` պատմության մեջ առաջին անգամ նվաճելով Չեմպիոնների լիգայի Լիգայի փուլի ուղեգիր։

Ֆաբրեգասը ֆուտբոլային կարիերայի ընթացքում 2011-14 թվականներին հանդես է եկել «Բարսելոնայում», 152 խաղում խփել 42 գոլ, կատարել 50 ասիստ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

Հ.Գ.Գ. միացե՛ք Interfootball-ի Instagram-ի էջին https://shorturl.at/6vBml