Պայքարեցինք, բայց չստացվեց. Հայաստանի հավաքականը պարտվեց Բոսնիա և Հերցեգովինային (տեսանյութ)

ԵՎՐՈ-2020-ի որակավորման փուլի J խմբի առաջին տուրում Հայաստանի հավաքականը հյուրընկալվել էր Բոսնիա և Հերցեգովինայի ընտրանուն:

Տանտերերը հաղթեցին 2:1 հաշվով: 33-րդ րոպեին անկյունայինից Պյանիչի փոխանցումից հետո Կրունիչը գլխի հարվածով բացել է հաշիվը: Հանդիպման հիմնական ժամանակի ավարտից 10 րոպե առաջ Միլոշևիչը 2-րդ գնդակն է ուղարկել մեր ազգային թիմի դարպասը:

Ավելացված ժամանակում ձեռքով խաղի համար 11 մետրանոց է նշանակվել: Հենրիխ Մխիթարյանը հստակ է իրացրել մոտեցումը՝ կրճատելով հաշվի տարբերությունը:

Վտանգավոր պահերի քանակով բոսնիացիները նկատելի առավելություն ունեին. դրվագներից մի քանիսում վերահաս գոլից փրկեց Արամ Հայրապետյանը: Գոլ խփելու 1-2 լավ հնարավորություն ուներ Հենրիխ Մխիթարյանը:

Խմբի մյուս խաղերում Իտալիան 2:0 հաշվով հաղթել է Ֆինլանդիային, Հունաստանը՝ նույն հաշվով Լիխտենշտեյնին:

Մարտի 26-ին Հայաստանի հավաքականը հյուրընկալելու է Ֆինլանդիային: