Արսենալի պաշտպանին դանակահարել են

«Արսենալի» պաշտպան Պաբլո Մարին, ով վարձավճարով հանդես է գալիս «Մոնցայի» կազմում, դանակահարվել է։

Ինչպես տեղեկացնում է Corriere dello Sport-ը, դեպքը տեղի է ունեցել Միլանի արվարձաններից մեկում` Ասագո առևտրի կենտրոնում։

Աղբյուրի փոխանցմամբ՝ 46-ամյա տղամարդը, ով, հավանաբար, հոգեկան խնդիրներ ունի, սուպերմարկետի դարակից դանակ է վերցրել և հարձակվել հաճախորդների վրա՝ լրջորեն վիրավորելով նրանցից առնվազն երկուսին։

Հարձակվողին կանգնեցրել են այցելուները, իսկ շուտով օգնության են հասել ոստիկանները, ովքեր ձերբակալել են այդ տղամարդուն։

Ընդհանուր առմամբ վիրավորվել է 6 մարդ, նրանց թվում է նաև Մարին։ Տուժածներին ուղղաթիռով հոսպիտալացրել են։

Libero Quotidiano-ի տեղեկություններով, տուժածներից մեկը` սուպերմարկետի գանձապահը, հարձակման ժամանակ տեղում մահացել է։

Նշվում է, որ իսպանացի ֆուտբոլիստը գիտակից է և կարողանում է խոսել։ Հիվանդանոցում նրան արդեն այցելել են «Մոնցայի» գլխավոր տնօրեն Ադրիանո Գալիանին և գլխավոր մարզիչ Ռաֆայել Պալադինոն։

Չնայած 29-ամյա պաշտպանը մեջքի հատվածում բավական խորը վնասվածք է ստացել, սակայն, բարեբախտաբար նրա կյանքին վտանգ չի սպառնում. ներքին օրգանները չեն վնասվել։

Այդ տեղեկությունը հաստատել է նաև Ադրիանո Գալիանին.

«Պաբլո Մարիին որևէ վտանգ չի սպառնում, քանի որ նրա ստացած վնասվածքը վտանգավոր չէ կյանքի համար։

Մենք հուսով ենք մոտ ժամանակներս տեսնել նրան թիմում»,- Գալիանիի խոսքերը մեջբերում է ինսայդեր Ֆաբրիցիո Ռոմանոն։

հավելենք, որ Պաբլո Մարին «Արսենալի» շարքերը համալրել է 2020 թ. հունվարին, որի կազմում անցկացրել է 22 հանդիպում` խփելով 1 գոլ։

Իսպանացի ֆուտբոլիստն ընթացիկ մրցաշրջանի մեկնարկից առաջ վարձավճարով տեղափոխվեց «Մոնցա», որի մարզաշապիկով դաշտ է դուրս եկել 8 անգամ և դարձել 1 գոլի հեղինակ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am