Սաուդյան Արաբիան նպատակ ունի ԱԱ-2034-ում հասնել նվազագույնը կիսաեզրափակիչ

Սաուդյան Արաբիան սկսել է նախապատրաստվել աշխարհի 2034 թ. առաջնությանը, հայտնում է Le Parisien-ը։

Աղբյուրի համաձայն` երկրում նպատակ ունեն տնային աշխարհի առաջնությունում հասնել նվազագույնը կիսաեզրափակիչ։ Դրա համար Սաուդյան Արաբիան ցանկանում է աշխատանքի հրավիրել ՊՍԺ-ի ֆուտբոլային գծով խորհրդական Լուիշ Կամպուշին։

Նախորդ շաբաթ Շվեյցարիայի Ժնև քաղաքում պորտուգալացի ֆունկցիոների և Սաուդյան Արաբիայի ներկայացուցիչների միջև բանակցություններ են կայացել։

Հաղորդվում է, որ մերձավորարևելյան երկրի ներկայացուցիչները 60-ամյա Կամպուշին 10 տարվա պայմանագիր են առաջարկել և 200 միլն եվրո աշխատավարձ (տարեկան` 20 միլիոն)։

Կամպուշը պետք է բարեփոխի և կազմավորի Սաուդյան Արաբիայի հավաքականը` աշխարհի առաջնության կիսաեզրափակչի հասնելու համար: Նա ունենալու է նաև միջանկյալ նպատակներ և առաջադրանքներ։

Պորտուգալացի մասնագետն արաբներին պետք է պատասխանի մինչև 2025 թ. դեկտեմբերի 31-ը։ Կամպուշը դեռ գործող պայմանագիր ունի ՊՍԺ-ի հետ և նախընտրում է աշխատանքը շարունակել փարիզյան ակումբում։ Այդուհանդերձ, կողմերի համաձայնագիրն ավարտվում է այս տարվա հուլիսի 1-ին և դրա երկարաձգման հարցում բանակցությունները փակուղի են մտել։

Բացի այդ, Կամպուշն աշխատանքի առաջարկներ ունի նաև «Արսենալից» և «Չելսիից»։ Նա «Պարի Սեն-Ժերմենում» աշխատանքի է անցել 2022 թ. հուլիսին, նախկինում տարբեր պաշտոններ է զբաղեցրել Մադրիդի «Ռեալում», «Մոնակոյում», «Սելտայում», «Լիլում», «Գալաթասարայում» և այլուր։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

Հ.Գ.Գ. Ֆուտբոլային մարզաշապիկներ կարող եք ձեռք բերել isport օնլայն խանութից