Լիվերպուլի ու Լեսթերի հաղթարշավը, Ժոզեի առաջին հաղթանակը, Արսենալի մղձավանջը?
Անգլիական պրեմիեր լիգայում այսօր մեկնակրել է 13-րդ տուրը։ Տուրի մեկնարկային խաղում «Վեսթ Հեմն» ընդունել էր «Տոտենհեմին»։
Որպես «Տոտենհեմի» գլխավոր մարզիչ՝ Ժոզե Մոուրինոյի նորամուտը հաջող ստացվեց։ «Շնաձկներին» հաջողվեց գոլառատ խաղում 2։3 հաշվով առավելության հասնել Մանուել Պելեգրինիի սաների նկատմամբ։
«Տոտենհեմի» կազմում աչքի ընկան Հին Մին Սոնը, Լուկաս Մոուրան և Հարի Քեյնը, իսկ տանտերերի կազմում՝ Մայքլ Անտոնիոն և Անջելո Օգբոննան։
«Տոտենհեմը» ընդհատեց 5 խաղից բաղկացած առանց հաղթանակների շարքը և 17 միավորով բարձրացավ 9-րդ հորիզոնական, իսկ «Վեսթ Հեմի» անկումը դեռ շարունակվում է․ «մրճահարները» 13 միավորով զբաղեցնում են 16-րդ հորիզոնականը։
Առաջնության առաջատար «Լիվերպուլը» շարունակում է միավորներ չկորցնել և վստահ քայլերով շարժվել դեպի բաղձալի չեմպիոնություն։ Յուրգեն Կլոպի սաների հերթական զոհը դարձավ «Քրիսթալ Փելեսը»։
«Լիվերպուլի» կազմում հանդիպման հաշիվը 49-րդ րոպեին բացեց Սադիո Մանեն։ Խաղավարտին մոտ՝ 82-րդ րոպեին, Վիլֆրիդ Զահային հաջողվեց խփել պատասխան գնդակը, սակայն րոպեներ անց՝ 85-րդ րոպեին, Ռոբերտո Ֆիրմինոն իր գոլով հաղթանակ պարգևեց «Լիվերին»։
Նշենք, որ «Լիվերպուլը» 13 խաղերից հետո 39 հնարավորից վաստակել է 37 միավոր՝ վստահորեն գլխավորելով մրցաշարային աղյուսակը, իսկ Ռոյ Հոջսոնի սաները 14-րդ տեղում են՝ վաստակած 15 միավորով։
Բրենդան Ռոջերսի գլխավորած «Լեսթերը» տարավ հինգերորդ անընդմեջ հաղթանակը։ «Աղվեսները» հյուրընկալվելով «Բրայթոնին՝ 2 անպատասխան գնդակ ուղարկեց տանտերերի դարպասը։
Հյուրերի կազմում աչքի ընկան Այոսե Պերեսն ու Ջեյմի Վարդին, ով 12 դիպուկ «կրակոցով» գլխավորում է ռմբարկուների ցուցակը։
«Լեսթերը» 29 միավորով զբաղեցնում է 2-րդ հորիզոնականը՝ առաջատար «Լիվերին» զիջելով 8 միավոր։ «Բրայթոնը» 12-րդ տեղում է։
Դե իսկ «Արսենալը» շարունակում է հիասթափեցնել։ Արդեն 5 խաղ է Ունայի Էմերիի սաներին չի հաջողվում կոտրել մրցակիցների դիմադրությունը։ Այսօր էլ «զինագործները» միավորներ կորցրին հետնապահների թվում ընթացող «Սաութհեմպտոնի» դեմ խաղում։ Այն «Սաութհեմպտոնի», որին «Լեսթերը» հյուրընկալվելիս մի քանի տուր առաջ հաղթել է 9։0 հաշվով։
Խաղն ավարտվեց ոչ-ոքի՝ 2։2 հաշվով։ Հյուրերի կազմում գոլերը խփեցին Դենի Ինգսն ու Ջեյմս Վորդ-Պրոուզը, իսկ «Արսենալի» կազմում դուբլի հեղինակ դարձավ Ալեքսանդր Լակազետն, ով իր թիմին պարտությունից փրկեց 90+6-րդ րոպեին խփած գոլի շնորհիվ։
«Արսենալը» հերթական միավորների կորստից հետո, 18 միավորով նահանջեց 7-րդ հորիզոնական, իսկ «Սաութհեմպտոնը» 9 միավորով նախավերջինն է։
Ավարտված մյուս հանդիպումներում գրանցվել են հետևյալ արդյունքները․
«Բորնմութ» 1։2 «Վուլվերհեմպթոն»
«Վոթֆորդ» 0։3 «Բյորնլի»
«Էվերթոն» 0։2 «Նորվիչ»
# ԱՊԼ