ՊՍԺ-ն նոր առաջարկ է կատարել Ինտերին

«Պարի Սեն-Ժերմենը» շարունակում է աշխատել կազմի ամրապնդման ուղղությամբ։

Ինչպես տեղեկացրել ենք, փարիզյան ակումբը լրջորեն հետաքրքրվաժ է «Ինտերի» կենտրոնական պաշտպան Միլան Շկրինյարի ծառայություններով։

Արդեն տևական ժամանակ է կողմերը տրանսֆերի հարցում բանակցություններ են վարում, սակայն դեռևս որևէ էական առաջընթաց չկա։

Ինչպես հայտնում է ինսայդեր Նիկոլո Սկիրան, «Փարիզը» սլովակ պաշտպանի դիմաց «ներաձուրիներին» մի քանի առաջարկ արդեն կատարել է, որոնք տատանվել են 50-60 մլն եվրոյի սահմաններում, սակայն դրանք միլանյան ակումբը մերժել է։

Աղբյուրի փոխանցմամբ` անցնող ժամերին ՊՍԺ-ն ևս մեկ առաջարկ է կատարել «Ինտերին» ու պատրաստ է գործարքի դիմաց վճարել արդեն 65 մլն եվրո։

Հատկանշական է, որ 27-ամյա պաշտպանի վաճառքից միլանյան ակումբը ցանկանում է ստանալ նվազագույնը 70 մլն եվրո, այդ պատճառով էլ դեռևս չի պատրաստվում ընդունել «Փարիզի» առաջարկները։

Դրան զուգահեռ, «Պարի Սեն-Ժերմենի» ղեկավարությունը մինչև 2027 թ. հունիսի 30-ը պայմանագիր է համաձայնեցրել Շկրինյարի հետ, իսկ նրա տարեկան աշխատավարձը կազմելու է 7.5 մլն եվրո։

Նշվում է` ՊՍԺ-ն վստահ է, որ առաջիկա օրերին ավարտին կհասցնի գործարքը։

Հավելենք, որ Միլան Շիրինյարը «Ինտերի» կազմում հանդես է գալիս 2017 թ. հուլիսից, որի մարզաշապիկով մինչ օրս անցկացրել է 215 հանդիպում` դառնալով 11 գոլի և 4 գոլային փոխանցման հեղինակ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am