ՕԽ. Մեքսիկան գերգոլառատ խաղում հաղթեց Հվ. Կորեային🎥

ՕԽ. Մեքսիկան գերգոլառատ խաղում հաղթեց Հվ. Կորեային🎥

31/07/2021 - 17:18

Տոկիո-2020-ի ֆուտբոլային մրցաշարում ավարտվեցին 1/4 եզրափակիչները։

Մրցաշարի այդ փուլի վերջին հանդիպման շրջանակում Մեքսիկայի օլիմպիական հավաքականը մրցեց Հարավային Կորեայի ընտրանու դեմ։

Հանդիպման մեկնարկում կողմերը բավական արագ փոխանակվեցին խփած մեկական գնդակով։

Նախ 12-րդ րոպեին Մեքսիկային առաջ մղեց Հենրի Մարտինը, ապա Դոն Գյոն Լին 20-րդ րոպեին գերազանց հարվածով խփեց պատասխան գնդակը։

Նախքան ընդմիջման գնալն «ացտեկները» ևս երկու անգամ գրավեցին հարավկորեացիների դարպասը, իսկ հաշիվը դարձավ 3:1. 30-րդ ու 39-րդ րոպեներին աչքի ընկան համապատասխանաբար Լուիս Ռոմոն և Սեբաստիան Կորդովան։

Կողմերն ընդմիջման գնացին մեքսիկների` երկու գնդակի առավելությամբ։

Երկրորդ կեսում կողմերն իսկական գոլային հրավառություն էին կազմակերպել։

51-րդ րոպեին Դոն Գյոն Լին հերթական գեղեցիկ գոլը խփեց, դարձավ դուբլի հեղինակ` կրճատելով նաև հաշիվը` 2:3։

Սակայն, ընդամենը 3 րոպե անց` 54-րդ րոպեին, իր դուբլով պատասխանեց Հենրի Մարտինը և վերակակգնեց Մեքսիկայի հավաքականի երկու գնդակի առավելությունը։

Հյուսիսամերիկացիների առավելությունը 64-րդ րոպեին էլ ավելի մեծարեց Սեբաստիան Կորդովան, ով նույնպես այս խաղուն դարձավ դուբլի հեղինակ։

Հավելենք, որ 24-ամյա կիսապաշտպանի երկրորդ գոլը պարզապես ֆանտաստիկ է ստացվել։

84-րդ րոպեին լուսատախտակին 6:2 հաշիվը վառեց Էստեբան Ագիրեն։

Այս հանդիպման գոլային հրավառությանը 90+1-րդ րոպեին վերջակետ դրեց հարավկորեացիների հարձակվող Վի Չո Հվանը։

Այսպիսով, Մեքսիկայի օլիմպիական հավաքականը գերգոլառատ խաղում 6:3 հաշվով հաղթեց Հարավային Կորեայի ընտրանուն և նվաճեց Տոկիո-2020-ի կիսաեզրափակչի ուղեգիր, որի շրջանակում օգոստոսի 3-ին կմրցի Բրազիլիայի ընտրանու դեմ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

# , , , , , , ,

Մեջբերումներ անելիս ակտիվ հղումը Interfootball.am-ին պարտադիր է: Կայքի հոդվածների մասնակի կամ ամբողջական հեռուստառադիոընթերցումն առանց Interfootball.am-ին հղման արգելվում է: Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:

© Interfootball.am 2023