Կեպան շատ մոտ է ակումբային գրանցումը փոխելուն

«Չելսիի» դարպասապահ Կեպա Արիսաբալագան, ամենայն հավանականությամբ, շուտով կփոխի ակումբային գրանցումը։

Ինչպես տեղեկացնում է ինսայդեր Նիկոլո Սկիրան, իսպանացի դարպասապահի ծառայություններով հետաքրքրված է «Նապոլին»։

27-ամյա ֆուտբոլիստը մտադիր է հեռանալ «Չելսիից», իսկ ստեղծված իրավիճակից փորձում է օգտվել «Նապոլին», որը մտադիր է Կեպայի միջոցով փոխարինել Դավիդ Օսպինային, ով հեռացել է ակումբից։

Նշվում է, որ նեապոլիտանական ակումբի և «ազնվականների» միջև բանակցությունները հաջող են ընթանում, ինչի արդյունքում գործարքը շատ մոտ է կայանալուն։

Սպասվում է, որ «Նապոլին» գնման իրավունքով կվարձակալի Կեպային, իսկ «Չելսին» կշարունակի վճարել իսպանացի դարպասապահի աշխատավարձի 50%-ը։

Կեպայի հիմնական նպատական այն է, որ տեղափոխվի այնպիսի ակումբ, որի կազմում կունենա խաղային պրակտիկա` Իսպանիայի հավաքականի կազմում ԱԱ-2022-ին մասնակցելու համար։

Հիշեցնենք, որ Կեպա Արիսաբալագան «Չելսիի» շարքերը համալրել է 2018 թ. հուլիսին։ Այդ ժամանակ լոնդոնյան ակումբը գործարքի դիմաց «Ատլետիկ Բիլբաոյին» վճարել է 80 մլն եվրո, ինչը դարպասապահների շրջանակում ռեկորդային ցուցանիշ է։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am