Բարսելոնան, հնարավոր է, ձախողի բրազիլացի ծագող աստղի տրանսֆերը

Օրեր առաջ ինսայդեր Ֆաբրիցիո Ռոմանոն հայտնեց, որ «Բարսելոնան» ավարտին է հասցրել բրազիլական «Ատլետիկո Պարանաենսեի» 18-ամյա կենտրոնական հարձակվող Վիտոր Ռոկեի գործարքը։

«Բլաուգրանան» տրանսֆերի դիմաց «Ատլետիկոյին» վճարելու է 35 մլն եվրո, որին ևս 10 մլն եվրո ավելանալու է հավելավճարների տեսքով։

Երիտասարդ ֆուտբոլիստը կատալոնական ակումբի շարքերը համալրելու է 2024 թ. հունվարի 1-ին։

Այդուհանդերձ, Mundo Deportivo-ն տեղեկացնում է, որ գործարքը, հնարավոր է, չկայանա։

Բանն այն է, որ համաձայնության հասնելուց հետո «կապտանռնագույնները» մինչ օրս «Ատլետիկոյին» չեն ուղարկել գործարքն ավարտին հասցնելու համար նախատեսված բոլոր անհրաժեշտ փաստաթղթերը։

Բրազիլական ակումբին զայրացրել է այդ փաստը և վերջնաժամկետ է ներկայացրել «Բարսելոնային». կա՛մ «բլաուգրանան» մեկ օրվա ընթացքում ուղարկում է բոլոր անհրաժեշտ փաստաթղթերը կա՛մ «Ատլետիկոն» գործարքի հարցում սկսում է դիտարկել նաև այլ առաջարկներ։

Նշվում է, որ Ռոկեի ծառայություններով հետաքրքրված են նաև «Մանչեսթեր Յունայթեդը», ՊՍԺ-ն և «Տոտենհեմը»։

Այդ ակումբները պատրաստ են խառնել «Բարսելոնայի» խաղաքարտերն ու Ռոկեին ձեռք բերելու հարցում տրանսֆերային առաջարկ կատարել։

Ինքը` Վիտոր Ռոկեն, «բլաուգրանայի» շարքերը չհամալրելու դեպքում, մտադիր է դիտարկել նաև վերոնշյալ ակումբների առաջարկները։

Հավելենք, որ Վիտոր Ռոկեն «Ատլետիկո Պարանաենսեի» կազմում 2023 թվականին անցկացրել է 30 հանդիպում` դառնալով 15 գոլի և 6 գոլային փոխանցման հեղինակ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am