Չելսին հիանալի տեսք ունի․ «ազնվականները» ներխուժում են Չեմպիոնների լիգայի գոտի 🎥

Անգլիական Պրեմիեր լիգայի 24-րդ տուրի շրջանակում «Չելսին» մրցեց «Նյուքասլի» դեմ։

Ինչպես և սպասվում էր, խաղը մեկնարկեց Թոմաս Տուխելի սաների առավելությամբ, ովքեր գրեթե կատարյալ առաջին խաղակես անցկացրին։

Խաղում ճակատագրական եղավ Թեմի Աբրահամի վնասվածքը, ով 15-րդ րոպեին խաղադաշտում իր տեղը զիջեց Օլիվիե Ժիրուին։

Ֆրանսիացի հարձակվողի ջանքերով էլ «ազնվականները» 31-րդ րոպեին բացեցին խաղի հաշիվը՝ գրավելով «Նյուքասլի» դարպասը։

Անցավ ևս 8 րոպե, և «կապույտները» լուսատախտակին վառեցին արդեն 2։0 հաշիվը․ անկյունայինի խաղարկումից հետո Մեյսոն Մաունթի կատարած փոխանցումը եզրափակեց Տիմո Վերները, ով ընդհատեց իր գոլային երաշտը։

Գերմանացի հարձակվողը Պրեմիեր լիգայի շրջանակում չէր կարողանում գոլի հեղինակ դառնալ 14 հանդիպում անընդմեջ։ 24-ամյա ֆուտբոլիստը ներքին առաջնությունում վերջին անգամ գոլի հեղինակ դարձել էր 2020 թվականի նոյեմբերի 7-ին, երբ 8-րդ տուրի շրջանակում գրավեց «Շեֆիլդ Յունայթեդի» դարպասը, իսկ «Չելսին» սեփական հարկի տակ հաղթեց 4։1 հաշվով։

Վերները «Չելսիի» կազմում ընթացիկ մրցաշրջանում բոլոր մրցաշարերի շրջանակում մասնակցել է արդեն 32 հանդիպման՝ դառնալով 10 գոլի և 9 գոլային փոխանցման հեղինակ։

Երկրորդ խաղակեսի մեկնարկում լոնդոնյան ակումբը մոտ էր հաշիվն էլ ավելի մեծացնելուն, սակայն նպաստավոր դիրքերից վրիպեցին Մատեո Կովաչիչն ու Մարկոս Ալոնսոն։

Խաղակեսի միջնամասից սկսած` «Չելսին» փորձեց հանգստացնել խաղը, ինչից էլ սկսեցին օգտվել «կաչաղակները», ովքեր, ստեղծելով մի քանի վտանգավոր պահեր, ամեն դեպքում, չկարողացան նույնիսկ կրճատել հաշվի տարբերությունը, իսկ խաղն ավարտվեց «Չելսիի» հաղթանակով՝ 2։0 հաշվով։

Այս հաղթանակից հետո Թոմաս Տուխելի թիմը վաստակեց 42 միավոր և բարձրացավ Չեմպիոնների լիգայի ուղեգիր տվող 4-րդ հորիզոնական։ Նույնքան միավոր ունի նաև «Վեսթ Հեմը», սակայն լրացուցիչ ցուցանիշներով հենց «կապույտներն» են 4-րդը։

«Նյուքասլն» էլ մնաց 25 միավորով և զբաղեցնում է 17-րդ հորիզոնականը։

Այսպիսով, Թոմաս Տուխելի՝ լոնդոնյան ակումբը գլխավորելուց է վեր «Չելսին» շարունակում է իր անպարտելի մրցելույթների շարքը՝ բոլոր մրցաշարերի շրջանակում վերջին 6 հանդիպումներից 5-ում տանելով անընդմեջ հաղթանակ։

Հ․Գ․ Միացեք մեր Telegram-ի ալիքին -> https://t.me/Interfootball_am