Արթուր Սերոբյանը մոտ է կարիերան արտերկրում շարունակելուն

«Արարատ-Արմենիայի» և Հայաստանի հավաքականի վինգեր Արթուր Սերոբյանը մոտ է կարիերան ռուսական «Կռիլյա Սովետովի» կազմում շարունակելուն։

Ինսայդեր Իվան Կարպովը հայտնում է, որ 20-ամյա եզրային ֆուտբոլիստը 3 տարվա պայմանագիր է համաձայնեցրել Սամարա քաղաքը ներկայացնող ակումբի հետ։

Երիտասարդ ֆուտբոլիստի տեղափոխության հարցում վերջնական որոշում կայացնելու է «Կռիլյա Սովետովի» գլխավոր մարզիչ Իգոր Օսինկինը։

Ըստ աղբյուրի` հայ ֆուտբոլիստի ծառայություններով հետաքրքրված է նաև Սլովենիայի 2023/24 մրցաշրջանի չեմպիոն «Ցելեն»։

Ֆուտբոլային ինսայդեր, մարզական մեկնաբան Սուրեն Մելիքսեթյանը սոցցանցերում գրում է, որ «Ցելեն» ու «Արարատ-Արմենիան» ֆուտբոլիստի տեղափոխության ֆինանսական հարցում չեն կարողացել համաձայնել հասնել։ Այժմ Սերոբյանը, ամենայն հավանականությամբ, կհամալրի «Կռիլյա Սովետովի» կազմը։

Սպասվում է, որ ռուսական ակումբը նախ կվարձակալի, ապա մոտ 300-400 հազար եվրոյով կգնի Սերոբյանի տրանսֆերային իրավունքը։

Բացի վերոնշյալ ակումբներից, Սերոբյանի ծառայություններով հետաքրքրված է նաև Շվեյցարիայի Սուպերլիգան ներկայացնող «Իվերդոնը», որը նրան դեռ նախորդ ամռանն էր ցանկանում ձեռք բերել։

Հիշեցնենք, որ Արթուր Սերոբյանն արտասահմանյան ակումբներում հանդես գալու փորձ արդեն ունի և 2023/24 մրցաշրջանի առաջին հատվածն անցկացրել է պորտուգալական «Կասա Պիայում»` 4 խաղում խփելով 1 գոլ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am