ՊՍԺ-ն հերթական խոշոր գործարքն է ավարտին հասցրել

«Լիոնի» եզրային հարձակվող Բրեդլի Բարկոլիան կարիերան կշարունակի ՊՍԺ-ի կազմում։

Ինչպես տեղեկացնում է ինսայդեր Ֆաբրիցիո Ռոմանոն, կողմերը գործարքի հարցում հասել են վերջնական համաձայնության, որի դիմաց փարիզյան ակումբը վճարելու է 45 մլն եվրո։

«Լիոնը» ևս 5 մլն եվրո վաստակելու է հավելավճարների տեսքով։

20-ամյա ֆուտբոլիոտի հաջորդ վաճառքից էլ «Լիոնն» ունենալու է 10% մասնաբաժին։

Նշվում է, որ Բարկոլիան արդեն մեկնել է Փարիզ և օգոստոսի 31-ին բուժզննում կանցնի «Պարի Սեն-Ժերմենի» համար։

Ռոմանոն հաստատում է, որ ՊՍԺ-ն սույն թվականի հունիսից փորձում էր ավարտին հասցնել այս գործարքը. փարիզյան ակումբի խորհրդական Լուիշ Կամպուշը երիտասարդ ֆուտբոլիստի տաղանդի մեծ երկրպագուն է։

Ինսայդեր Նիկոլո Սկիրային էլ հայտնի է դարձել, որ կողմերը կնքելու են 5 տարվա պայմանագիր` մինչև 2028 թ. հունիսի 30-ը։

Հավելենք, որ Բրեդլի Բարկոլիան «Լիոնի» սան է, որի հիմնական թիմում անցկացրել է 47 հանդիպում` դառնալով 7 գոլի և 12 գոլային փոխանցման հեղինակ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am