Նախկին գործակալ. «Ռուսական ակումբներից մեկը Մխիթարյանին առաջարկում էր 30 մլն եվրո աշխատավարձ»
Նախկին գործակալ Տիգրան Մկրտչյանը Матч ТВ-ին տված հարցազրույցի ժամանակ խոսել է «Ինտերի» կիսապաշտպան Հենրիխ Մխիթարյանի մասին.
– Ռուսաստանը վաղուց Մխիթարյանի մակարդակի ֆուտբոլիստ չի ունեցել։ Որտեղի՞ց Հայաստանին նման ֆուտբոլիստ։
– Մխիթարյանի հայրն ուժեղ ֆուտբոլիստ է եղել։ Նրա ընտանիքն առհասարակ շատ ֆուտբոլային է. մայրն աշխատել է ֆուտբոլի ֆեդերացիայում, իսկ քույրը` ՈՒԵՖԱ-ում։
Բացի դրանից, Հենրիխը շատ ժամանակ է անցկացրել Ֆրանսիայում և Բրազիլիայում, որտեղ փորձաշրջան է անցել։ Նրա զարգացմանը մեծ ուշադրություն են դարձրել ընտանիքում։
Գումարած դրան` հետսովետական երկրների շատ ֆուտբոլիստների համեմատ` նա տարբերվում է իր մտածելակերպով։ Մխիթարյանը մշտապես մեծ նպատակներ է ունեցել և գնացել է դրանց հետևից։
Անձամբ ճանաչում եմ նրան, այդ պատճառով էլ գիտեմ, թե նա որքան ուշադրություն է դարձնում իր խաղային ու ֆիզիկական որակներին։
– Գործակալ Վալերի Հովհաննիսյանը ժամանակին պատմել է, որ Մխիթարյանը, հանուն թոփ առաջնությունում հանդես գալու, հրաժարվել է «Սպարտակի» առաջարկից, որը նրան «դատարկ» պայմանագիր էր տվել, ու նա ինքը կարող էր որոշել իր աշխատավարձի չափը։
– Այո՛, նման բան եղել է։ Հենրիխը քաղաքավարի հրաժարվել է դրանից` ասելով, որ ցանկանում է Եվրոպայում խաղալ։
Նա տարբեր ժամանակահատվածներում կարիերան Ռուսաստանում շարունակելու մի քանի առաջարկներ է ունեցել։ Թե՛ «Սպարտակը», թե՛ «Կրասնոդարը» և թե՛ «Անժին», երբ այնտեղ հավաքված էին բոլոր աստղերը, մշտապես հետաքրքրված են եղել Մխիթարյանի ծառայություններով։
«Զենիթն» էլ վերջերս է միացել այդ պայքարին, սակայն Հենրիխը նրանց բոլորին ասել է, որ դեռևս ցանկանում է հանդես գալ եվրոպական որևէ ակումբում։
«Անժին» նրան առաջարկել էր 5 տարվա պայմանագիր` 30 մլն եվրո աշխատավարձով։ Այն ժամանակ դա շատ ավելին էր, քան նա կարող էր վաստակել Եվրոպայում, սակայն Մխիթարյանը մերժել է այն։
Հիշեցնենք, որ Հենրիխ Մխիթարյանն իր կարիերայի ընթացքում հանդես է եկել «Փյունիկի», «Մետալուրգ Դոնեցկի», «Շախտյոր Դոնեցկի», «Բորուսիա Դորտմունդի», «Մանչեսթեր Յունայթեդի», «Արսենալի» և «Ռոմայի» կազմում, իսկ վերջերս համալրեց «Ինտերի» շարքերը։
Հ․Գ․ միացե՛ք Interfootball-ի Telegram-ի ալիքին https://t.me/Interfootball_am
# Անժի, Զենիթ, Ինտեր, Կրասնոդար, Հենրիխ-Մխիթարյան, Սպարտակ, տրանսֆերներ