Էվերթոնից, հնարավոր է, կրկին միավորներ հանվեն

Ինչպես տեղեկացնում է Sky Sports-ը, «Էվերթոնն» ու «Նոթինգհեմ Ֆորեսթը» մեղադրվում են անգլիական Պրեմիեր լիգայի ֆինանսական օրենքները խախտելու համար։

Աղբյուրի փոխանցմամբ` երեք մրցաշրջանի ընթացքում ակումբներին թույլատրված է ունենալ միայն 105 մլն ֆունտի վնաս։

Պրեմիեր լիգան հայտնել է, որ երկու թիմերն էլ հաստատել են, որ խախտել են վերոնշյալ օրենքը 2022/23 մրցաշրջանի վերջնամասում:

Այժմ ակումբների գործերը փոխանցվել են դատական ​​մարմնի նախագահին, ով պետք է սահմանի առանձին անկախ հանձնաժողովներ, որոնք կզբաղվեն պատժամիջոցների հարցերով։

Միաժամանակ երկու ակումբներն էլ համարում են, որ ունեն համոզիչ փաստարկներ, որոնք թույլ կտան խուսափել պատժից։

«Էվերթոնը», որն արդեն բողոքարկել է Պրեմիեր լիգայի կայացրած նախորդ որոշումը (խմբ.` Պրեմիեր լիգան 2023 թ. նոյեմբերին արդեն 10 միավոր հանել է «իրիսներից»), վստահ է, որ հերթական լսումներից հետո նոր մեղադրանքները կհամարվեն անհիմն։

«Իրիսներն» արդեն հայտարարել են, որ ծախսերի ավելացումը կապված է «Գուդիսոն Պարկ» մարզադաշտի կառուցման նախագծի ֆինանսավորման համար վերցված վարկի մարման հետ։

«Նոթինգհեմ Ֆորեսթն» էլ պահանջելու է, որպեսզի ֆինանսական fair-play-ի շրջանակում ներառվի Բրենան Ջոնսոնի վաճառքից ունեցած եկամուտը, որն ակումբն ստացել է Պրեմիեր լիգայի կողմից դիտարկվող ժամանակաշրջանից միայն երկու ամիս անց։

Նշենք, որ «անտառապահները» Բրենան Ջոնսոնին 2023 թ. ամռանը «Տոտենհեմին» վաճառել են 55 մլն եվրոյի դիմաց։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am