Բարսելոնայի կիսապաշտպանը որոշել է փոխել ֆուտբոլային քաղաքացիությունը

«Բարսելոնայի» կիսապաշտպան Իլայիշ Մորիբան կողմնորոշվել է, թե որ երկրի հավաքականի կազմում է հանդես գալու։

Ինչպես տեղեկացնում է Cadena Ser-ը, 18-ամյա կիսապաշտպանը որոշել է ներկայացնել ոչ թե Իսպանիայի, այլ Գվինեայի հավաքականը։

Մորիբան ծնվել է Գվինեայի մայրաքաղաք Կոնակրիում, սակայն 2017 թ. սկսած հանդես է գալիս «Բարսելոնայի» համակարգում ու ունի Իսպանիայի քաղաքացիություն։

Երիտասարդ ֆուտբոլիստը խաղացել է Իսպանիայի տարբեր տարիքային հավաքականներում (Մ-17 ու 18, այժմ էլ Մ-19 տարեկանների հավաքականի անդամ է), որոնց կազմում ընդհանուր առմամբ անցկացրել է 9 հանդիպում` դառնալով 2 գոլի հեղինակ։

Նշվում է, որ Մորիբայի այս որոշումը կապված չէ «Բարսելոնայի» ղեկավարության հետ ունեցած կոնֆլիկտի հետ։

Սպասվում է, որ 18-ամյա կիսապաշտպանը շուտով կհրավիրվի Գվինեայի հավաքական` մասնակցելու սեպտեմբերի 1-ին ԱԱ-2022-ի որակավորման փուլի Գվինեա-Բիսաուի դեմ կայանալիք հանդիպմանը։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am