Արարատ-Արմենիան եվրոպական առաջնությունների շրջանակում ամենաքիչն է գոլ բաց թողնում

Պարզվում է՝ VBet Հայաստանի Պրեմիեր լիգան ներկայացնող երկու ակումբ բավական ամուր պաշտպանություն ունեն։

Ինչպես տեղեկացնում է Vnews.am-ը, 2020/21 մրցաշրջանի ընթացքում եվրոպական բոլոր առաջնությունների շրջանակում «Արարատ-Արմենիան» ունի ամենահուսալի պաշտպանությունը։

Դավիդ Կամպանիայի թիմն, անցկացրած 9 խաղերից հետո, բաց է թողել ընդամենը 3 գնդակ։ Ընդ որում՝ այդ 3 գոլերն էլ «Արարատ-Արմենիան» բաց է թողել առաջնության մեկնարկային խաղերում, իսկ հաջորդ 6 խաղերում ակումբը դարպասն անառիկ է պահել։

3 գնդակ ունի բաց թողած նաև Ջիբրալթարը ներկայացնող «Սենթ Ժոզեֆ» ակումբը, որը, սակայն, ի տարբերություն «Արարատ-Արմենիայի»՝ մեկ հանդիպում պակաս է անցկացրել։

Եվրոպական առաջնությունների շրջանակում լավագույն պաշտպանություն ունեցողների եռյակը եզրափակում է չեխական «Սլավիա Պրահան», որն անցկացրած 13 խաղում բաց է թողել 4 գոլ։

Հատկանշական է, որ հայկական ակումբներից «Արարատը» 13-րդն է (10 խաղ, բաց թողած 6 գոլ), «Ալաշկերտն» ու «Փյունիկն» էլ բաց թողած 8-ական գոլով նույնպես հայտնվել են թոփ-20-ում։

Այսպիսով, եվրոպական առաջնությունների շրջանակում 2020/21 մրցաշրջանի ընթացքում լավագույն պաշտպանություն ունեցող ակումբների թոփ իննյակն ունի հետևյալ տեսք․

1․ «Արարատ-Արմենիա» (Հայաստան) – 9 խաղ, 3 գոլ

2․ «Սենթ Ժոզեֆ» (Ջիբրալթար) – 8 խաղ, 3 գոլ

3․ «ՍլավիաՊրահա» (Չեխիա) – 13 խաղ, 4 գոլ

4․ «Դյուդելանժ» (Լյուքսեմբուրգ) – 8 խաղ, 4 գոլ

5․ «Եվրոպա» (Ջիբրալթար) – 8 խաղ, 4 գոլ

6․ «Շերիֆ» (Մոլդովա) – 20 խաղ, 5 գոլ

7․ «Շտուրմ» (Ավստրիա) – 11 խաղ, 5 գոլ

8․«Ռեյնջերս» (Շոտլանդիա) – 23 խաղ, 6 գոլ

9․ «Ատլետիկո Մադրիդ» (Իսպանիա) – 16 խաղ, 6 գոլ