ՊՍԺ-ն գրեթե լուծեց ՄՅՈւ-ի հետ դիմակայության հարցերը, Ռոման հաղթեց Պորտուին (տեսանյութ)

Կայացան Չեմպիոնների լիգայի 1/8 եզրափակչի երկու դիմակայությունների առաջին հանդիպումները:

Օրվա կենտրոնական խաղում «Մանչեսթեր Յունայթեդը» հյուրընկալել էր «Պարի Սեն Ժերմենին»: Փարիզյան թիմը հաղթեց 2:0 հաշվով: Գոլազուրկ առաջին խաղակեսից հետո, 53-րդ րոպեին անկյունայինից փոխանցումից հետո Կիմպեմբեն գրավել է Դե Խեայի դարպասը: Ընդամենը 7 րոպե անց Մբապեն կրկնապատկել է հաշիվը:

Հանդիպման վերջնամասում Պոգբան 2-րդ դեղին քարտով հեռացվել է դաշտից:

Թոմաս Տուխելի գլխավորած թիմը լուրջ առավելություն է ստանում պատասխան հանդիպումից առաջ:

Մյուս խաղում «Ռոման» սեփական հարկի տակ 2:1 հաշվով հաղթել է «Պորտուին»: Հռոմեական թիմից Զանիոլոյի դուբլին մեկ գոլով պատասխանել է Ադրիենը:

Դիմակայությունների պատասխան հանդիպումները կայանալու են մարտի 6-ին: