Զիդանը հեռանում է Ռեալից. կողմերը շուտով հանդես կգան հայտարարությամբ

Զիդանը հեռանում է Ռեալից. կողմերը շուտով հանդես կգան հայտարարությամբ

27/05/2021 - 10:36

Ինչպես տեղեկացնում է իտալացի լրագրող Ֆաբրիցիո Ռոմանոն, «Ռեալ Մադրիդի» գլխավոր մարզիչ Զինեդին Զիդանը որոշել է հեռանալ ակումբից։

Աղբյուրի փոխանցմամբ` ֆրանսիացի մասնագետն այդ մասին 26-ին տեղեկացրել է այն մարդկանց, ովքեր աշխատում են մադրիդյան ակումբում իր և ֆուտբոլիստների հետ։ Նա նրանց ասել է, որ 100-տոկոսով հեռանալու է։

48-ամյա մասնագետը դեռևս պետք է զրուցի «արքայական» ակումբի նախագահ Ֆլորենտինո Պերեսի հետ, իսկ իր որոշման մասին կհայտարարի առաջիկա ժամերին։

Ռոմանոն ավելի ուշ Twitter-ի իր միկրոբլոգում ևս մեկ գրառում է կատարել.

««Ռեալն» ու Զինեդին Զիդանն առաջիկա ժամերին/օրերին հանդես կգան պաշտոնական հայտարարությամբ` հայտարարելով, որ նրանց ճանապարհները բաժանվում են։ Զիդանը միանշանակ հեռանում է։

«Ռեալը» մարտ ամսից ուղիղ կապի մեջ է Մասիմիլանո Ալեգրիի հետ, սակայն այժմ նա բանակցում է նաև ու «Յուվենտուսի» ու «Ինտերի» հետ»։

Այսպիսով, Զինեդին Զիդանն իր մարզչական կարիերայի ընթացքում որոշել է երկրորդ անգամ հեռանալ «Ռեալից»։

Հիշեցնենք, որ ֆրանսիացի մասնագետը մադրիդյան ակումբի գլխավոր մարզչի պաշտոնում առաջին անգամ նշանակվել է 2016 թ. հունվարին։ Նա այդ ժամանակ «սերուցքայինների» ղեկին աշխատեց մինչև 2018 թվականի հունիս, սակայն 2019 թ. մարտին կրկին դարձավ հարազատ ակումբի գլխավոր մարզիչը։

«Ռեալը» ֆրանսիացի մասնագետի գլխավորությամբ նվաճել է 11 տիտղոս` այդ թվում երեք անգամ անընդմեջ դառնալով Չեմպիոնների լիգայի հաղթող։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

# , ,

Մեջբերումներ անելիս ակտիվ հղումը Interfootball.am-ին պարտադիր է: Կայքի հոդվածների մասնակի կամ ամբողջական հեռուստառադիոընթերցումն առանց Interfootball.am-ին հղման արգելվում է: Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:

© Interfootball.am 2023