«Գնա՛ գրողի ծոցը, անառակի որդի». Լուկակուն ու Բարելան վիճել են Սամպդորիայի դեմ խաղում🎥

Իտալական Ա սերիայի 22-րդ տուրում «Ինտերը» հյուրընկալվելիս չկարողացավ կոտրել «Սամպդորիայի» դիմադրությունը. գրանցվեց 0:0 հաշիվը։

Այդ խաղում «ներաձուրիների» կիսապաշտպան Նիկոլո Բարելայի և կենտրոնական հարձակվող Ռոմելու Լուկակուի միջև կոնֆլիկտ է տեղի ունեցել։

Հանդիպման 40-րդ րոպեին Բարելան ձեռքերով ինչ-որ ժեստ է ցույց տվել բելգիացի հարձակվողին, որը հաճախ է անում։

Ինչպես հայտնում է Football Italia-ն, այդ ժեստն անչափ զայրացրել է Լուկակուին.

«Մի արա դա։ Հերի՛ք է ձեռքերով նման բաներ անես։ Դա վիրավորական է, վերջացրո՛ւ»։

Հավանական է, որ դրանից հետո Բարելան ինչ-որ բան է ասել Լուկակուին, քանի վայրկյաններ անց 29-ամյա հարձակվողը պատասխանել է.

«Գնա՛ գրողի ծոցը, անառակի որդի»։

Միլանյան ակումբի գլխավոր մարզիչ Սիմոնե Ինձզագին դժգոհել է ստեղծված իրավիճակից.

«Դաշտում նման բան է տեղի ունենում, ինչից պետք է խուսափել։ Այդ ամենը տեսնելն ինձ դուր չի գալիս, սակայն նրանք ընդմիջմանը հարթեցին իրավիճակը, քանի որ հիանալի ընկերներ են։

Այդուհանդերձ, ակնհայտ է, որ ես նման բաներ չեմ ցանկանում տեսնել»,- նշել է 46-ամյա մասնագետը։

Հավելենք, որ «Ինտերն» այս ոչ-ոքիից հետո վաստակեց 44 միավոր և զբաղեցնում է 2-րդ հորիզոնականը։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am